30 naýryz kúni Reseıdiń Federaldy qaýipsizdik qyzmeti (FSB) amerıkalyq jýrnalıst Evan Gershkovıchti Ekaterınbýrg qalasynda júrgen jerinen ustady. The Wall Street Journal (WSJ) tilshisi tyńshy retinde tanylyp, ústinen is qozǵaldy, dep habarlaıdy "Adyrna" ulttyq portaly.
Sot 30 naýryzda Wall Street Journal jýrnalısi Evan Gershkovıchti tyńshylyq jasady degen aıyppen qamaýǵa aldy. "Dojd" telearnasynyń habarlaýynsha, amerıkalyq jýrnalısterge qatysty mundaı oqıǵa 1986 jyldan keıin, araǵa uzaq ýaqyt salyp taǵy qaıtalanyp otyr.
Gershkovıch reseılikterdiń "PMK Vagnerge" qatysy týraly materıal daıyndaý úshin Ekaterınbýrgke barǵan jerinde ustaldy.
"Keshki vedomostı"-diń málimetinshe, jýrnalısti qala ortalyǵyndaǵy meıramhana janynda quryqtalǵan. Qarapaıym kıingen qaýipsizdik qyzmetkerleri er adamdy bastyrmalap, kólikke qaraı súırep, ur da soq árekettermen julqylaı jónelgen.
Reseıdiń barlaý qyzmeti jýrnalıstiń "AQSh tapsyrmasy boıynsha" aqparat jınaýmen aınalysqanyn málimdedi.
Oraıy kelgende aıta keteıik, tyńshy retinde aıyp arqalaǵan Evan Gershkovıch Máskeýde 2017 jyldan beri jumys istep keledi. Ol udaıy túrde Reseı men Ýkraınadaǵy aqıqaty kúńgirt oqıǵalar jaıynda qalam terbep, saıası taqyryptaryń teriskeı tusyn ashyq jazady.
"Adyrna" ulttyq portaly
