رەسەي الەۋمەتتىك جەلىدە قازاقستان تۇرعىندارىن جارناما ارقىلى اسكەرگە تارتا باستادى. بۇل تۋرالى Reuters جازدى، دەپ حابارلايدى «ادىرنا» ءتىلشىسى.
«جارنامادا قازاقستان مەن رەسەي تۋلارى كورىنەدى جانە «پلەچوم ك پلەچۋ» (يىق تىرەسە) دەگەن ۇران جازىلعان. اۆتورلار رەسەي قورعانىس مينيسترلىگىمەن كەلىسىمشارتقا وتىرعاندارعا ءبىر رەتتىك 495 مىڭ رۋبل، كەيىن اي سايىن 190 مىڭ رۋبل تولەۋگە ۋادە بەرىپ وتىر»،—دەپ جازدى باسىلىم.
جارنامالاردا ساحالين ايماعىنداعى رەسەي اسكەرىنە قوسىلۋ مۇمكىندىگىن ۇسىناتىن ۆەب-سايت كورسەتىلگەن.
ەسكە سالايىق، قازاقستان ۇكىمەتى رەسەيدىڭ ۋكرايناعا قارسى اشقان سوعىسىن قولدامايدى جانە جۇرتشىلىقتى بەيبىتشىلىككە شاقىرادى.
قازاقستان زاڭناماسى بويىنشا شەتەلدەگى اسكەري قاقتىعىستارعا اقىلى تۇردە قاتىسۋ زاڭسىز بولىپ ەسەپتەلەدى.
