الماتىداعى اكتريسا قازا تاپقان اپاتتا ايىپتالۋشى ءىلياس كار وقيعا بولعان جەردەن نەگە قاشىپ كەتكەنىن ءتۇسىندىردى، - دەپ حابارلايدى سوت زالىندا وتىرعان Tengrinews.kz ءتىلشىسى.
ءىلياس كارعا جول ەرەجەسىن بۇزدى، سونىڭ سالدارىنان ابايسىزدا ءۇش ادامنىڭ ولىمىنە اكەپ سوققان جول-كولىك وقيعاسىن جاسادى جانە اپات بولعان جەردەن قاشىپ كەتتى دەگەن ايىپ تاعىلعان.
اپات 2018 جىلى 29 جەلتوقساندا بولدى. Mercedes Gelandewagen ءاۆتوموبيلىن جۇرگىزگەن ىلياس كار Mitsubishi Galant كولىگىن سوققان. مۇنىڭ الدىندا پوليتسەيلەر وقيعا بولعان كۇنى ول ماس بولعانىن مالىمدەگەن. ال ءىلياس كار سول كەشتە مەيرامحانا مەن كاراوكەگە بارعانىن مويىنداسا دا، ىشىمدىك ىشپەگەنىن مالىمدەدى.
ونىڭ ايتۋىنشا، ول ونكولوگيالىق اۋرۋعا شالدىققان. سوتتالۋشى اپاتقا دەيىن بىرنەشە مينۋت بۇرىن نە بولعانىن ايتىپ بەردى. كار كاراوكەدەن شىعىپ، دالادا ايەلىمەن ۇرىسىپ قالعانىن مالىمدەدى.
"كولىككە وتىرىپ ناۋرىزباي باتىر داڭعىلىمەن كەلە جاتىپ، باتىس باعىتتا وڭعا اباي داڭعىلىنا بۇردىم. ەكىنشى جولاقپەن قوزعالدىم، سەبەبى ءبىرىنشى جولاق اۆتوبۋستاردىكى بولدى. الدىمداعى جاسىل باعدارشامدى كورىپ، وتىپ كەتۋ ءۇشىن جىلدامدىق قوستىم. كەيىن باعدارشامنىڭ جانىپ-ءوشىپ تۇرعانىن بايقادىم، تەجەپ ۇلگەرمەيتىنىمدى ءتۇسىندىم. بۇل تاڭعى ۋاقىت ەدى، جاڭبىر سەبەلەپ تۇرعان", - دەپ ءتۇسىندىردى ول. پروكۋروردىڭ ايتۋىنشا، اپات كەزىندە ءىلياس كار شەكتەۋگە قاراماستان ساعاتىنا 94 شاقىرىم جىلدامدىقپەن جۇرگەن. سوتتالۋشى قيىلىستا ورنىنان قوزعالايىن دەپ تۇرعان اۆتوبۋستى كورىپ، ونى اينالىپ وتپەكشى بولعانىن ايتتى. "سوسىن الدىمنان Mitsubishi شىقتى، ال مەن ونىڭ ورتاسىنا سوعىلدىم. كولىك شەتىمەن اۋدارىلدى. ال مەنى ار جاققا الىپ كەتتى. قارسى باعىتقا شىعا جازدادىم. كەيىن كولىكتەن شىعىپ، الگى كولىككە قاراي جۇگىردىم. ونى اۋدارىپ ورنىنا قويۋعا تىرىستىق. ىشىنەن ادامداردى كوردىم، ەس ءتۇسسىز جاتتى. كومەكتەسۋگە تىرىستىم، ولاردى شىعارىپ العىم كەلدى. بىراق ءبىر ەر ادام ولاي جاساسام، زيانىم ءتيىپ كەتۋى مۇمكىندىگىن ايتتى. كەيىن جەدەل جاردەم قىزمەتىن شاقىرۋلارىن سۇرادىم. مىنا ادامدار، كۋاگەرلەر، كولىكتى مەن جۇرگىزگەنىمدى بىلمەدى. ءبىر كەزدە: "جۇرگىزۋشى قايدا؟" دەپ كولىگىمە قاراي جۇگىرىپ، ايعايلاپ سۇراي باستادى. بىلاپىت سوزدەر ايتىپ ۇرسا باستادى. مەن ايىپتاۋ باستالىپ كەتۋى مۇمكىن ەكەنىن ءتۇسىندىم", - دەدى ءىلياس كار.
ونىڭ ايتۋىنشا، وسىدان كەيىن ول سەيفۋللين بويىمەن سولتۇستىك باعىتقا كەتكەن. سوتتالۋشى سىرتقى كيىمدى كولىكتە قالدىرعانىن اتاپ ءوتتى. "ودان ءارى سول جاقتاعى اۋلاعا كىردىم. وندا تاڭعى سەگىزگە دەيىن وتىردىم. كەيىن ماسانچي كوشەسىنە شىعىپ، تاكسي ۇستاپ، "باراحولكا" جاققا كەتتىم، كۇرتەشەنى، اياق كيىمدى ساتىپ العىم كەلدى. وزىمدە جازدىق اياق كيىم بولاتىن. زاتتار ساتىپ الدىم. سول جەردە تانىسىم رامازانعا حابارلاسىپ، "يۋپيتەر" بازارىنا شاقىردىم. مەن وعان جاعدايدى ءتۇسىندىردىم، ول زاڭگەرگە بارۋعا كەڭەس بەردى. تۇستە زاڭگەرگە حابارلاستىق، بىراق ول قالا سىرتىندا بولدى", - دەدى ول. كەيىن كار كەلەسى كۇنى، 30 جەلتوقساندا زاڭگەرىمەن پوليتسيا بولىمشەسىنە كەلگەنىن حابارلادى. كەيىن ول تەرگەۋشىمەن قان تاپسىرۋعا اۋرۋحاناعا بارعانىن ايتتى. وسىدان كەيىن ءىلياس كاردى ۋاقىتشا ۇستاۋ يزولياتورىنا قامادى. سوتتالۋشى كولىك جۇرگىزۋدە 15 جىلدىق تاجىريبەسى بار ەكەنىن جانە جول-كولىك وقيعاسىنا بۇرىن سوڭدى ءتۇسىپ كورمەگەنىن اتاپ ءوتتى.
