شىمكەنتتە ۇلتتىق سپورت تۇرلەرى بويىنشا حالىقارالىق جارىس مارەسىنە جەتتى

1299
Adyrna.kz Telegram

شىمكەنت قالاسىندا ناۋرىز مەيرامىنا وراي «GREAT QAZAQ GAMES» اتتى سپورتتىق سايىستار ءوتتى. وندا ەلىمىزدىڭ بارلىق وڭىرلەرىنەن جانە تۇركيا، قىتاي، موڭعوليا، وزبەكستان، قىرعىزستان، تاجىكستان، رەسەي، ساۋد ارابياسى مەن يوردانيادان كەلگەن سپورتشىلار باق سىنادى. ولار 3 كۇن بويىنا كوكپار، بايگە، تەڭگە ءىلۋ، اۋدارىسپاق، جامبى اتۋ، قازاق كۇرەسى، ءداستۇرلى ساداق اتۋ جانە توعىزقۇمالاق سەكىلدى ۇلتتىق سپورت تۇرلەرى بويىنشا باق سىنادى.

شىمكەنت قالاسىنداعى جاڭا يپپودرومدا وتكەن بايراقتى باسەكەدە اۋدارىسپاق 5 سالماق دارەجەسى بويىنشا ءوتتى. ناتيجەسىندە 60 كەلىگە دەيىنگى سالماق دارەجەسىندە – اقتوبەلىك ازامات سەرعازين، 70 كەلىگە دەيىن – تاعى ءبىر اقتوبەلىك سپورتشى شىڭعىسحان ەرجانوۆ، 80 كەلىدە – تۇركىستاندىق دارىن وتكەلباي، ال، 90 كەلىدە تۇركىستان وبلىسىنىڭ تاعى ءبىر وكىلى ەسىمحان ءراحماتىللا جەڭىسكە جەتتى. ال، 90 كەلىدەن جوعارى سالماقتا اقتوبە وبلىسىنان كەلگەن پالۋان ارمان ساعىمباەۆتىڭ باعى جانىپ، «GREAT QAZAQ GAMES» ويىندارىنىڭ جەڭىمپازى اتاندى.

كورەرمەن قاۋىم ءۇشىن ەڭ قىزىقتى سايىستىڭ ءبىرى كوكپار بولعانى تالاسسىز. كوماندالىق كوكپار بويىنشا جۇلدەلى 3-ءشى ورىن جارىس قوجايىندارى شىمكەنت قالاسىنىڭ كوكپارشىلارىنا بۇيىردى. فينالدا قىرعىزستان رەسپۋبليكاسىنىڭ ۇلتتىق قۇراماسى مەن جامبىل وبلىسى اراسىندا تارتىستى ويىن بولدى. ناتيجەسىندە جامبىلدىق كوكپارشىلار جەڭىسكە جەتتى.

قازاق كۇرەسى بويىنشا پالۋاندار 8 سالماق دارەجەسىندە باق سىناپ، ءوزارا جەڭىمپازداردى انىقتادى. وعان قوسا ءتۇي پالۋاندى انىقتاۋعا ارنالعان بەلدەسۋلەردە ءۇشىنشى ورىن قىزىلوردالىق سپورتشى ماقسات يساعابىلوۆ يەلەندى. ال، فينالعا قوس بىردەي شىمكەنتتىك پالۋان ەرسۇلتان مۇزاپپاروۆ پەن مارات بايقۇماروۆ شىقتى. تارتىستى وتكەن بەلدەسۋدىڭ قورىتىندىسى بويىنشا مارات بايقۇماروۆ جەڭىسكە جەتىپ، «GREAT QAZAQ GAMES» ويىندارىنىڭ تۇيە پالۋانى اتاندى.

مۇنان بولەك كونەدەن كەلە جاتقان ءداستۇرلى سپورت تۇرلەرىنىڭ ءبىرى –جامبى اتۋ بويىنشا سايىستار ءۇش ءتۇرلى ستيل، اتاپ ايتقاندا، تۇرىك، كورەي جانە قازاق ءستيلى بويىنشا ۇيىمداستىرىلدى. سونداي-اق، تەڭگە ءىلۋ مەن اسىق اتۋ، ەرلەر مەن ايەلدەر اراسىندا توعىزقۇمالاق جانە ءداستۇرلى ساداق اتۋ سايىستارى تارتىستى ءوتىپ، ناۋرىزدا كوپشىلىككە مەرەكەلىك كوڭىل-كۇي سىيلادى.

پىكىرلەر