پرەزيدەنت سايلاۋى قارساڭىندا قوعامدىق باستاما نەگىزىندە ەل ازاماتتارى قۇرعان «BAQYLA» قوعامدىق قوزعالىسى ەلىمىزدە 2023 جىلدىڭ 19 ناۋرىزى كۇنى وتكەن قر پارلامەنتى ءماجىلىسى مەن ماسليحاتتار سايلاۋىندا ەلىشىلىك تۇراقتىلىق پەن سايلاۋ پروتسەدۋرالارىنىڭ قاتاڭ ساقتالۋىن قامتاماسىز ەتۋ ءۇشىن سايلاۋ ۋچاسكەلەرىن قامتيتىن وڭىرلىك شتابتاردا باقىلاۋشىلىق جاسادى.
اۋماقتىق باقىلاۋشىلار جەلىسى جۇمىسى الماتى قالاسىنداعى ورتالىق شتاب پەن ەلىمىزدىڭ 17 قالاسىندا ورنالاسقان وڭىرلىك شتابتار ارقىلى جۇرگىزىلدى.
قوعامدىق قوزعالىس 2022 جىلعى كەزەكتەن تىس پرەزيدەنت سايلاۋىندا 27 قالادا داۋىس بەرۋ بارىسىن قاداعالاۋ جۇمىسىن ءساتتى اتقارعان بولاتىن.
ال بيىلعى قر پارلامەنتى ءماجىلىسى مەن ماسليحاتتار سايلاۋىندا «BAQYLA» قوعامدىق قوزعالىسى سايلاۋ پروتسەسىن باقىلاۋعا ارالاسىپ، رەسپۋبليكا بويىنشا 25 قالا مەن ەلدى-مەكەندى قامتي الدى. سونىمەن قاتار، 5 مىڭنان استام باقىلاۋشىنى وقىتتى.
سايلاۋ كۇنى ەلدەگى بارلىق سايلاۋ ۋچاسكەسىنىڭ 3 مىڭىن، ياعني 30 پايىزىن قامتي الدىق دەپ ايتا الامىز.
وسىعان بايلانىستى 2023 جىلدىڭ 20 ناۋرىزى كۇنى الماتى قالاسىندا «BAQYLA» قق باستاماشىلارى ارنايى ءباسپاسوز جيىنىن وتكىزدى.
اسحات قاسەنعالي، ساياساتتانۋشى:
سايلاۋ كۇنى 300-دەن استام زاڭ بۇزۋشىلىق تىركەلدى. تاڭعى 06:00-دەن باستالعان سايلاۋ پروتسەسى باقىلاۋشىلارعا ورىن بەرمەۋ، داۋىس بەرۋ كابينكالارىنا ەكى-ءۇش ادامنان كىرۋ، داۋىس ساناۋ بارىسىنا قاتىستىرماۋ جانە حاتتاما بەرمەۋگە تىرىسۋ سياقتى زاڭسىزدىقتار بولاتىن. باقىلاۋشىلارعا ورىن بەرمەي، 100-گە جۋىق باقىلاۋشى سايلاۋدى تۇرىپ باقىلاۋعا ءماجبۇر بولدى. زاڭ بۇزۋ فاكتىلەرى جايلى اقپاراتتار ءالى دە جيناقتالۋدا. ءبىر مانداتتى جۇيەمەن تۇسكەندەرگە قاتىستى اقپاراتتار كەلۋدە. ەلدەگى اقپاراتتىق ءدۇمپۋ جاعىنان ەڭ تارتىستى وتكەن، ال داۋىس بەرۋشىلەر جاعىنان انتيرەكوردتىڭ ءبىرى ورناعان سايلاۋدا تاۋەلسىز باقىلاۋشىلار ءوز مىندەتتەرىن ءتيىستى دارەجەدە اتقاردى.
ماقسات جاقاۋ، ساياساتتانۋشى:
2023 جىلعى پارلامەنت ءماجىلىسى مەن ماسليحاتىنا بولعان سايلاۋ، بارلىق ءۇمىت ارتقان باستامالارىمەن، بيلىكتىڭ بىلتىرعى جولداۋدا ايتىلعان ۋادەلەردىڭ ءىس جۇزىندە ورىندالا باستاۋىمەن بايلانىستى. سايلاۋعا داۋىس بەرۋشىلەردەن گورى كانديداتتار مەن باقىلاۋشىلار بەلسەندى ءارى كوپ قاتىستى. بۇل سايلاۋدا كوپتەن بەرى بولماعان جەتى ساياسي پارتيانىڭ قاتىسۋىن باقىلادىق. بۇل سايكەسىنشە، پرەزيدەنت قاسىم-جومارت كەمەلۇلىنىڭ پارلامەنتتە پىكىرلەر الۋاندىعىن جاساقتايتىن كوپپارتيالىق جۇيە مەن جەكە مانداتپەن كەلەتىن دەپۋتاتتاردىڭ كوپتەپ بولۋىنا جاعداي تۋعىزۋ قاجەتتىلىگى ەدى. اتالعان ساياسي وزگەرىستەردىڭ باستاماسى جۇزەگە اسىرىلۋدا، بۇعان كەشەگى سايلاۋلار كۋا. جالپى سايلاۋعا كوزى تورتەۋ بولىپ ەلىمىزدە 90-100 مىڭعا جۋىق ەرىكتى تاۋەلسىز باقىلاۋشىلار سايلاۋدىڭ زاڭنىڭ اياسىندا تازا ءارى ءادىل وتۋىنە اتسالىستى. بۇل دەموكراتيانىڭ جاڭا قارلىعاشتارى، ادىلدىك پەن ادالدىقتىڭ قورعاۋشىلارى ءحام قولداۋشىلارى دەپ قابىلداۋىمىز كەرەك. وسىلايشا سايلاۋدان-سايلاۋعا قادام باسقان سايىن ساياسي مادەنيەتتىلىك پەن دەموكراتيالىق ىلگەرىلەۋ بولادى. بۇل زاڭدىلىق.
