دۇيسەنبى كۇنى اقش-تا سايلاۋشىلار القاسى داۋىس بەرىپ، 3 قاراشا كۇنگى پرەزيدەنت سايلاۋىندا دجو بايدەننىڭ جەڭىسكە جەتكەنىن راستادى. امەريكا اقپارات قۇرالدارى بۇل جولى دونالد ترامپ سايلاۋ كەزىندە "جاپپاي داۋىس بۇرمالاندى" دەپ مالىمدەگەندىكتەن ادەتتە ءجاي عانا پروتسەدۋرا بولىپ سانالاتىن سايلاۋشىلار القاسىنىڭ داۋىس بەرۋ پروتسەسىنە قوعام نازارى ەرەكشە اۋدى دەپ حابارلايدى "ادىرنا" قلتتىق پورتالى azattyq-قا سىلتەمە جاساپ.
وسىعان دەيىن جاريالانعان ەسەپ بويىنشا، بايدەن سايلاۋشىلار القاسىنىڭ 306 داۋىسىنا يە بولعان. زاڭ بويىنشا، كانديداتتىڭ جەڭۋى ءۇشىن 270 داۋىس كەرەك.
سايلاۋدىڭ رەسمي قورىتىندىسىن 6 قاڭتاردا كونگرەسس راستاۋى ءتيىس. كونگرەسس مۇشەلەرىنىڭ ءاربىر شتاتتا داۋىس بەرۋ ناتيجەسىن داۋلاۋعا قۇقىعى بار. بىراق كوپتەگەن ساراپشىلار كونگرەسس وعان بارا قويمايدى دەپ ەسەپتەيدى. ترامپ جاقتاستارى سايلاۋ ناتيجەسىن داۋلاۋعا تىرىسسا دا، وكىلدەر پالاتاسىندا دەموكراتتار باسىم بولعاندىقتان كەز كەلگەن تالپىنىس ساتسىزدىككە ۇشىراۋى مۇمكىن دەپ ايتىلادى.
بايدەن يناۋگۋراتسياسى 20 قاڭتاردا وتەدى.
بريتاندىق BBC سايتىنىڭ جازۋىنشا، سايلاۋشىلار القاسىنىڭ اراسىندا بۇرىنعى مەملەكەتتىك حاتشى، 2016 جىلعى پرەزيدەنت سايلاۋىندا دونالد ترامپتان جەڭىلگەن حيللاري كلينتون دە بار. ول نيۋ-يورك شتاتىنان سايلانعان سايلاۋشىلار القاسىنىڭ مۇشەسى.
وسىعان دەيىن حيللاري كلينتون پرەزيدەنت جالپىحالىقتىق سايلاۋدا داۋىس بەرۋ ارقىلى سايلانۋى ءتيىس دەپ "سايلاۋشىلار القاسى ينستيتۋتىنىڭ تيىمسىزدىگىن" اتاپ وتكەن. 2016 جىلى كلينتون ترامپتان 3 ميلليون ارتىق داۋىس جيناسا دا، سايلاۋشىلار القاسىنىڭ داۋىسى جەتپەي جەڭىلگەن ەدى.
