ءماجىلىس دەپۋتاتتىعىنا كانديدات تۇرسىنبەك ومىرزاقوۆ ءبىر اي بويى ۇگىت-ناسيحات جۇمىسىن جۇرگىزگەن ەرىكتىلەرگە ۋادە ەتكەن جالاقىلارىن بەرمەي، الداپ كەتكەن. بۇل تۋرالى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى ZTB.KZ رەداكتسياسىنا حابارلادى، دەپ جازادى "ادىرنا" ۇلتتىق پورتالى.
ولاردىڭ ايتۋىنشا، سايلاۋعا ءبىر اي قالعاندا 55 ستۋدەنت كانديدات تۇرسىنبەك ومىرزاقوۆتىڭ شتابىمەن كەلىسىم شارتقا وتىرعان. ولار ومىرزاقوۆتى ناسيحاتتاۋمەن اينالىسۋى كەرەك ەدى.
"19 اقپاننان 17 ناۋرىزعا دەيىن جۇمىس ىستەدىك. باسىندا بىزگە ارقايسىمىزدىڭ جالاقىمىز 150 000 تەڭگەنى قۇرايتىنىن ايتتى. ءبىز كەلىسىپ، جۇمىس ىستەدىك. ايازدى كۇندەرى ۇگىت-ناسيحات پاراقتارى مەن پلاكاتتاردى جاپسىردىق. ارقايسىمىزعا بەلگىلى ءبىر اۋماقتاردى ءبولىپ بەردى. ءجۇرىپ-تۇرۋ شىعىنىن ءوزىمىز كوتەردىك»، - دەيدى ستۋدەنتتەردىڭ ءبىرى.
ۇگىت-ناسيحات ناۋقانى اياقتالعاندا ستۋدەنتتەرگە كەلىسىم-شارتتىڭ وزگەرگەنى تۋرالى حابارلاندى.
«ەندى ولار ء"ار ۇگىت-ناسيحات پاراعىنا نەمەسە پلاكاتقا 50 تەڭگەدەن تولەيمىز" دەگەندى العا تارتىپ وتىر. ياعني بۇل دەگەنىمىز ەرىكتىلەر نەبارى 30-35 مىڭ تەڭگە الادى دەگەن ءسوز. قايتا بىزگە مۇلدە باسقا سوما ۋادە ەتىلگەن بولاتىن»، - دەپ شاعىمدانادى ستۋدەنت.
جىگىت بۇل جۇمىسقا ۋنيۆەرسيتەتتىڭ قاتىسى جوق ەكەنىن ايتادى.
ء"بىز بۇل جۇمىستى تانىستارىمىز ارقىلى ءوزىمىز تاپتىق. قوسىمشا تابىس تاپقىمىز كەلدى. تۇبىندە وسىنداي ماسەلەگە تاپ بولاتىنىمىزدى بىلسەك، ەشقايسىمىز مۇنداي جۇمىس ىستەمەس ەدىك. ءبىز تەك العاشقى كەلىسىم شارتتىڭ تالاپتارى ورىندالعانىن قالايمىز. بىزگە جالاقى كەرەك. بۇدان ارتىق ەشتەڭە قاجەت ەمەس", - دەپ كومەك سۇرادى ستۋدەنتتەر.
ەسكە سالايىق، بۇگىن قازاقستاندا پارلامەنت ءماجىلىس پەن ءماسليحاتتاردىڭ كەزەكتەن تىس سايلاۋى ءوتىپ جاتىر.
"ادىرنا" ۇلتتىق پورتالى
