بيلىك باسىنداعىلارعا ودا جازىپ، اتى شىققان اقىن بالتابەك نۇرعاليەۆ ەسىمىن اۋىستىردى. بۇل تۋرالى اقىن ءوزىنىڭ Facebook-تاعى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
اقىننىڭ جاڭا نىسپىسى – يسلامبەك.
بالتابەك ءوز اتىنىڭ ءاۋ باستا ازان شاقىرىلماي قويىلعانىن جانە جاڭا قازاقستاندا سول ولقىلىقتىڭ ورنىن تولتىرۋعا بەل بايلاعانىن جازعان.
"مەن اتىمدى قويعان ادامنان: "مەنىڭ اتىم ازان شاقىرىلىپ قويىلعان با؟" دەپ سۇرادىم. ول "جوق" دەدى. سوندىقتان مەن بۇل ولقىلىقتىڭ ورنىن تولتىرۋ ءۇشىن، تۇرعىزىلعانىنا عاسىر تولعان مەشىتكە بارىپ، اتىمدى ازان شاقىرتىپ قويعىزىپ الدىم. ەندى مەندە جاڭا ەسىم – "يسلامبەك". قۇجات بويىنشا – بالتابەك. ال ازان شاقىرىلۋى بويىنشا ەسىمىم – يسلامبەك. جاڭا قازاقستان قۇرۋ ءۇشىن ادامدا جاڭا ەسىم بولۋى كەرەك دەپ شەشتىم. دۇرىس پا؟", – دەپ جازدى بالتابەك نۇرعاليەۆ.
