Batys Qazaqstan aımaǵynda sý tasqyny saldarynan 1 adam kóz jumdy. Al shyǵyn bolǵan mal-múlikte esep joq, dep habarlaıdy "Adyrna" ulttyq portaly "QazAqparat"-qa silteme kórsete otyryp.
BQO TJ departamenti jaǵdaıǵa qatysty málimdeme jasady. Shyńǵyrlaý aýdanyna qarasty Aqtaý aýylynan 11 naýryz kúni, saǵat 19.00-de 1984 jáne 1977 jylǵy eki er adam Aqsaı qalasyna qaraı traktormen shyqqan.
14 naýryz kúni saǵat 17.17-de olardyń joǵalyp ketkeni jóninde habar túsken. Dál sol ýaqytta Bórli aýdanynda sý tasqyny oryn alǵan. Saǵat 23.25-te Aqsaı qalasynan «QPO b.v.» kompanııasynyń jol talǵamaıtyn kóligi izdeýge shyqqan. Alaıda jol bolmaǵandyqtan, saǵat 03.00-de izdeý toqtatylǵan.
BQO polıııa departamentiniń baspasóz qyzmetkeri Darıǵa Májıtovanyń aıtýynsha, atalǵan er adamdar Aqtaý aýylyna járdem berýge baryp, keri qaıtqan kezde traktor balshyqqa batyp qalǵan. Bireýi kómek izdep ketken de, ekinshisi, 1984 jylǵy er adam aıaǵy aýyrǵandyqtan, kútip qalǵan.
«15 naýryz kúni Bórli aýdany Aqbulaq aýylynan 9 shaqyrym jerde ashyq daladan 1984 jylǵy er adamnyń múrdesi tabyldy. Onyń denesinde zorlyq-zombylyq belgileri bolǵan joq. Atalǵan derek adam ólimi retinde tirkeldi. Saraptama júrgizilýde. Bastapqy sebebi – sýǵa ketken», - dedi D.Májıtova. Muny "QazAqparat" bólisti.
BQO densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, ekinshi er adam Bórli aýdandyq aýrýhanasynyń terapevtik bólimshesinde jatyr. Onyń oń jaq ókpesi qabynǵan. Jaǵdaıy - aýyr.
Batys Qazaqstandaǵy sý tasqyny zardaptaryn seıilý jáne joıý jumystary jalǵasyp jatyr. Qazirgi kúni 100-den astam kıik sýdan shyǵarylǵan. 57 turǵyn úıden sý sorý jumystary aıaqtalyp, 275 adam baspanalaryna oraldy. Degenmen Jaıyq ózenindegi sý deńgeıi áli kóterýlýi múmkin deıdi mamandar. Olar turǵyndardy saq, sergek bolýǵa shaqyrady.
Al turǵyndar jaýapty mekemeler men el basynda júrgen tulǵalardyń mundaı tabıǵattyń tosyn minezine daıyn bolmaǵanyn, daıyndyq júrgizbegenin aıtyp otyr.
"Adyrna" ulttyq portaly
