بۇل تۋرالى وڭىرلىك كوممۋنيكاتسيالار الاڭىندا «قارجى ورتالىعى» اق-نا قاراستى دەپارتامەنت باسشىسى دياس جامبىلوۆ ايتتى.
ماماننىڭ ايتۋىنشا، قارجى ورتالىعىنىڭ جۇزەگە اسىرىپ جاتقان ءبىرىنشى جوباسى – ستۋدەنتتىك جاتاقحانالار سالۋدى قارجىلاندىرۋ. ياعني، بەلگىلى ءبىر كاسىپكەر الماتى سەكىلدى مەگاپوليستە نە باسقا وبلىستىق ماڭىزى بار قالالاردا جاتاقحانا سالۋعا نيەتتى بولسا، قارجى ورتالىعى تاراپىنان اقشا الا الادى. بۇل تەتىك مەملەكەتتىك تاپسىرىس نەگىزىندە جۇزەگە اسادى.
«جاتاقحانا تۇرعىزۋ كەزىندە قارجى ورتالىعى توسەك ورىنىنا بايلانىستى قاراجات بولەدى. الماتى قالاسىندا نىساندى جاڭادان سالىپ جاتقان كاسىپكەرلەرگە جىلىنا ءار ستۋدەنت ءۇشىن 230 اەك كولەمىندە اقشا بولىنەدى، باسقا قالالار ءۇشىن بۇل سومانىڭ كولەمى – 195 اەك مولشەرىندە بولماق. كاسىپكەرلەر 6 جىل بويى قارجىلاندىرىلادى. ال نىساندى قايتا پايدالانۋعا بەرۋ ماقساتىندا جاسالاتىن جوندەۋ جۇمىستارىنا ءبىر ستۋدەنت ءۇشىن الماتى قالاسىندا 92 اەك، باسقا قالالاردا 47 اەك كولەمىندە قاراجات بولىنەدى. بۇل جاعدايدا بيزنەس وكىلدەرىنە 8 جىل بويى اقشا تولەنەدى»، - دەدى دياس جامبىلوۆ.
قازىرگى تاڭدا قارجى ورتالىعىنىڭ ەنشىسىندە 10 مىڭ توسەك ورىنىن قامتيتىن جوبالار بار.
ورتالىقتىڭ قولعا العان كەلەسى جوباسى – مەكتەپ قۇرىلىسىن قارجىلاندىرۋ. بىراق مۇندا تولەم ەكى باعىتتا جۇرگىزىلەدى:
• امورتيزاتسيالىق تولەمدەر – جەكە مەنشىكتەگى مەكتەپ عيماراتى پايدالانۋعا بەرىلگەننەن كەيىن 8 جىل ىشىندە ءار وقۋشى ءۇشىن جىلىنا 96 اەك كولەمىندە، ال وقۋ وشاعىن قايتا جاڭارتۋ ءۇشىن بەرىلەتىن قارجى كولەمى ءبىر بالاعا - 47 اەك.
• وپەراتسيالىق تولەمدەر - وقۋشىلاردىڭ ناقتى سانى بويىنشا وتەلەدى. جان باسىنا شاققانداعى نورماتيۆ ءبىر وقۋشىعا جىلىنا ورتا ەسەپپەن 590 000 تەڭگەنى قۇرايدى (تولەم مەكتەپ جۇمىس ىستەپ تۇرعان كەزدە بارلىق ۋاقىتتا جۇرگىزىلەدى).
قازىرگى تاڭدا ەلىمىزدە 270 مىڭ وقۋشى ورنى تاپشىلىعى بار.
سونىمەن قاتار سپيكەر قارجى ورتالىعىندا «Aqyl»، «Bilim-Life» دەپوزيتتەرىنىڭ جۇمىس جاسايتىنىن ايتتى.
«Aqyl» دەپوزيتىنىڭ ارتىقشىلىعى كوپ. مىسالى، بانكتىڭ سىياقىسىنان بولەك، سالىمشىعا 7 پايىز مەملەكەتتىك سىياقى تولەنەدى. سالىمداعى اقشانى نەسيەنى، باسقا دا قارىزداردى وتەۋ ءۇشىن مەملەكەت تە، باسقا تۇلعالار دا الا المايدى جانە جاس شەكتەۋى جوق»، - دەدى مامان.
ماماننىڭ ايتۋىنشا، كەلىسىم اياسىندا "حالىق-Life" اق ءومىردى ساقتاندىرۋ كومپانيالارى اراسىندا ءبىرىنشى بولىپ ءومىردى جيناقتاۋشى ساقتاندىرۋدىڭ جاڭا ءونىمى - "Bilim-Life"شىعاردى. بۇل ءونىم قازاقستاننىڭ كەز كەلگەن ازاماتىنا ءوز بالاسىن ءبىزدىڭ ەلىمىزدە دە، شەتەلدە دە جوو-عا وقىتۋعا قاجەتتى سومانى جيناقتاۋعا مۇمكىندىك بەرەدى. ءونىمنىڭ ماقساتى: مەملەكەت سىيلىقاقىسىمەن ءبىلىم الۋعا جيناقتاۋ، جيناقتاۋ مەرزىمىنە اتا-انانىڭ ءومىرىن ساقتاندىرۋ.
«ال جوو-نا وقۋعا ءتۇسۋ ءۇشىن بەرىلەتىن نەسيەگە كەلسەك، مۇندا ستۋدەنتتەر 20 پايىزدىق مولشەرلەمەمەن كرەديت الا الادى. بۇل باعدارلامانىڭ ارتىقشىلىعى نەسيەنى وتەۋ ۋاقىتىن 10 جىلعا دەيىن سوزۋعا بولادى»، - دەدى دياس جامبىلوۆ.
تولىعىراق اقپاراتتى 7123 نومىرىنە حابارلاسىپ بىلە الاسىزدار.
