ەلوردادا 3000-عا جۋىق ادامنىڭ قاتىسۋىمەن «AMANAT» پارتياسىنىڭ «حالىقپەن بىرگە!» فورۋمى ءوتتى. ءىس-شاراعا ءماجىلىس پەن ماسليحاتتارعا كانديداتتار، پارتيا بەلسەندىلەرى مەن جاقتاستارى جانە «جاستار رۋحى» جاستار قاناتىنىڭ مۇشەلەرى قاتىستى.
ءوز سوزىندە «AMANAT» توراعاسى ەرلان قوشانوۆ ۇگىت-ناسيحات كەزەڭىندەگى قاجىرلى ەڭبەگى ءۇشىن پارتيالاستارعا العىس ايتىپ، جاستار قاناتىنىڭ جاسامپازدىعى مەن بەلسەندىلىگىن ەرەكشە اتاپ ءوتتى.
«بۇل سايلاۋ، ەڭ الدىمەن اماناتتىقتاردىڭ مىزعىماس بىرلىگى مەن بەرەكەسىن، مۇقالماس جىگەرى مەن رۋحىن كورسەتتى. ءبىر ايدىڭ ىشىندە 30 مىڭ كەزدەسۋ وتكىزىپ، 4 ميلليوننان استام ادامدى قامتىدىق. كەزدەسۋلەر بارىسىندا پارتيانىڭ سايلاۋالدى باعدارلاماسىن تالقىلاپ، ازاماتتاردىڭ تالاپ-تىلەكتەرىن جينادىق»،- دەدى ول.
ەرلان قوشانوۆ «AMANAT» پارتياسى پرەزيدەنتتىڭ قوعامدىق تىرەگى رەتىندە ساياسي مادەنيەتتىڭ جاڭا ترەندىن قالىپتاستىرىپ، وزگەرىستەردىڭ درايۆەرىنە اينالعانىن اتاپ ءوتتى.
«ءبىز تاريحتا قالاتىن ءىس تىندىرىپ جاتىرمىز جانە وعان ارقايسىمىز ۇلەس قوسۋدامىز. ۇگىت-ناسيحات جۇمىسىنىڭ بارلىق كەزەڭىندە ءبىز سايلاۋشىلارمەن اشىق اڭگىمەلەستىك، دەباتتارعا قاتىستىق، كەز كەلگەن الاڭدا قارسىلاستارمەن پىكىرتالاس جۇرگىزدىك. «AMANAT» شالعايداعى اۋىلدا دا، تيك-توكتا دا بولدى»، - دەدى ول.
پارتيا توراعاسى سايلاۋدان كەيىن ۇگىت-ناسيحات پلاكاتتارىنىڭ ورنىن ناقتى ىستەر الماستىرۋ كەرەك ەكەنىن اتاپ ءوتتى. ونىڭ ايتۋىنشا، 19 ناۋرىز – 19 ميلليون حالىقتىڭ بولاشاعىن ايقىندايتىن كۇن.
«جاۋاپكەرشىلىك جۇگىن سەزىنەتىن پارتيا جاڭا ناۋقانعا دايىندىق سايلاۋدان كەيىنگى كۇنى-اق باستالاتىنىن بىلەدى. سايلاۋالدى باعدارلامانىڭ بارلىق تارماعى تولىق ورىندالۋى ءتيىس. سەبەبى، ونداعى ءار تسيفردىڭ ارتىندا ادام تاعدىرى تۇر. ءبىز العان باعىتىمىزدان تايمايمىز. ەلدىڭ مۇددەسى مەن ۇلتتىڭ بولاشاعى جولىندا ايانباي قىزمەت ەتۋگە ءاردايىم دايىنبىز!»، - دەدى ەرلان قوشانوۆ.
سونداي-اق فورۋم بارىسىندا پارتيادان پارلامەنت ءماجىلىسى دەپۋتاتتىعىنا كانديداتتار ماقسات تولىقباي، ەسەن ەلەۋكەن، نارتاي سارسەنعاليەۆ، سەۆدا اليەۆا، رينات زايتوۆ، ولگا سپيرينا، جۇلدىز سۇلەيمەنوۆا جانە اسحات ايماعامبەتوۆ ءسوز سويلەدى.
دايىنداعان: "AMANAT" پارتياسىنىڭ ءباسپاسوز قىزمەتى
“AMANAT” پارتياسىنىڭ سايلاۋ قورى قاراجاتى ەسەبىنەن تولەندى
