«تابليعي جاماعات» ءدىني-ەكسترەميستىك ۇيىمىنىڭ مۇشەسى ەسىرتكى ساقتادى دەگەن كۇدىكپەن ۇستالدى. بۇل تۋرالى قالالىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
كۇدىكتىنى پوليتسيا قىزمەتكەرلەرى تۇنگى ساعات ءبىر جارىمدا الماتىنىڭ الاتاۋ اۋدانىنداعى «ۇلجان» ىقشاماۋدانىندا قولعا تۇسىرگەن.
«بۇل - 1987 جىلى تۋعان د.ەسىمدى ازامات. ول جامبىل وبلىسىنىڭ تۋماسى. جەدەل دەرەكتەرگە سايكەس، قر اۋماعىندا تىيىم سالىنعان «تابليعي جاماعات» ءدىني-ەكسترەميستىك ۇيىمىنىڭ قولداۋشىسى. كۇدىكتىنىڭ جەكە باسىن ءتىنتۋ بارىسىندا ىشىندە ەسىرتكى سالىنعان پوليەتيلەن بايلامى تابىلدى جانە تاركىلەندى. ۇستالعان ازامات ەسىرتكىنى زاڭسىز ساقتاعانىن مويىندادى. اتالعان دەرەك قر قك-ءنىڭ 296-بابى 2-بولىگى بويىنشا سوتقا دەيىنگى تەرگەۋدىڭ بىرىڭعاي تىزىلىمىنە تىركەلدى. سوت-حيميالىق ساراپتاما تاعايىندالدى»، - دەدى الماتى قالالىق پد ەكسترەميزمگە قارسى كۇرەس باسقارماسىنىڭ باستىعى پوليتسيا پودپولكوۆنيگى دارحان ابىقۇلوۆ.
قىلمىستىق ءىستىڭ باسقا دا ءمان-جايلارى قر قپك-ءنىڭ 201 بابى جانە قر كونستيتۋتسياسىنىڭ نورمالارىنا سايكەس جاريا ەتۋگە جاتپايدى.
