نۇرسۇلتان نازارباەۆتىڭ ءىنىسى بولات نازارباەۆ مەملەكەتكە الماتىداعى اۋىر ماشينا جاساۋ زاۋىتىنىڭ اكتسيالارىن قايتارۋى ءتيىس. جوعارعى سوتتىڭ ازاماتتىق ىستەر جونىندەگى سوت القاسى وسىنداي شەشىم قابىلدادى، دەپ حابارلايدى “ادىرنا” ۇلتتىق پورتالى.
جوعارعى سوتتىڭ ازاماتتىق ىستەر جونىندەگى سوت القاسى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتى بولات نازارباەۆ پەن "رLS-تم" جشس-ءنىڭ "الماتى اۋىر ماشينا جاساۋ زاۋىتى" اق باعالى قاعازداردى ساتىپ الۋ-ساتۋ شارتىنىڭ ءبىر بولىگىن جارامسىز دەپ تانۋ تۋرالى تالابى بويىنشا ازاماتتىق ءىستى قارادى. بۇل ماسەلە بۇعان دەيىن دە ءارتۇرلى ساتىداعى سوتتاردا بىرنەشە رەت قارالعان.
ءىس ماتەريالدارى بويىنشا مەملەكەتتىك مۇلىك دەپارتامەنتى 1998 جىلعى اقپاندا "ازتم" اق جارعىلىق قورىنىڭ 31,9 پايىز مولشەرىندە مەملەكەتتىك اكتسيالار پاكەتىن تەندەر جەڭىمپازى – "تەمىر قون" جشس-عا 105,3 ميلليون تەڭگەگە ساتتى. ساتىپ الۋ-ساتۋ شارتى زاۋىت قىزمەتىنىڭ بەيىنىن ساقتاۋ، ءوندىرىس كولەمىن ۇلعايتۋ تۋرالى تالاپتاردى، سونداي-اق ولاردىڭ ورىندالۋىن باقىلاۋ كوميتەتىنىڭ قۇقىعىن كوزدەدى. 2007 جىلعى ساۋىردە "تەمىر قون" جشس بولات نازارباەۆقا ازتم جارعىلىق كاپيتالىنىڭ 86,78 پايىز اكتسياسىن ساتقان. ونىڭ 31,9 پايىزى مەملەكەتتىك پاكەت بولدى. تاعى ەكى جىلدان كەيىن مەملەكەتتىك مۇلىك كوميتەتى، "تەمىر قون" جشس جانە بولات نازارباەۆ 1998 جىلى جاسالعان شارت بويىنشا تۇلعالاردى مىندەتتەمەلەرىنە اۋىستىرۋ تۋرالى كەلىسىم جاساستى. قۇجات ەگەر بولات نازارباەۆ تالاپتاردى ورىنداماسا، ول مەملەكەتتىك اكتسيالار پاكەتىن كوميتەتكە قايتارۋعا مىندەتتى ەكەنىن كوزدەدى.
بىراق ول شارت جاساسقان كۇننىڭ ارتىنشا "PLS-تم" جشس اكتسيالارىن وزگەگە ساتقان. ءارى قۇجاتتا ەشقانداي مىندەتتەمە كورسەتىلمەيدى. وسىلايشا بۇل ءىس قايتا قارالىپ، ناقتى شەشىم شىعارىلدى.
"بولات نازارباەۆ پەن "PLS-تم"جشس اراسىندا جارعىلىق قوردىڭ 31,9 پايىزىن قۇرايتىن "الماتى اۋىر ماشينا جاساۋ زاۋىتى" اق-نىڭ جاي اتاۋلى اكتسيالارىن ساتۋ بولىگىندە جاسالعان 2009 جىلعى 2 ساۋىردەگى باعالى قاعازداردى ساتىپ الۋ-ساتۋ شارتى جارامسىز دەپ تانىلسىن. بولات نازارباەۆقا "ازتم" اق – نىڭ جاي اتاۋلى اكتسيالارىن زاۋىتتىڭ جارعىلىق كاپيتالىنىڭ 31,9 پايىزى مولشەرىندە مەملەكەت مەنشىگىنە قايتارۋعا مىندەتتەلسىن", - دەلىنگەن قاۋلىدا.
