Nursultan Nazarbaevtyń inisi Bolat Nazarbaev memleketke Almatydaǵy aýyr mashına jasaý zaýytynyń akııalaryn qaıtarýy tıis. Joǵarǵy Sottyń azamattyq ister jónindegi sot alqasy osyndaı sheshim qabyldady, dep habarlaıdy “Adyrna” ulttyq portaly.
Joǵarǵy Sottyń azamattyq ister jónindegi sot alqasy Qarjy mınıstrliginiń Memlekettik múlik jáne jekeshelendirý komıteti Bolat Nazarbaev pen "RLS-TM" JShS-niń "Almaty aýyr mashına jasaý zaýyty" AQ baǵaly qaǵazdardy satyp alý-satý shartynyń bir bóligin jaramsyz dep taný týraly talaby boıynsha azamattyq isti qarady. Bul másele buǵan deıin de ártúrli satydaǵy sottarda birneshe ret qaralǵan.
Is materıaldary boıynsha memlekettik múlik Departamenti 1998 jylǵy aqpanda "AZTM" AQ jarǵylyq qorynyń 31,9 paıyz mólsherinde memlekettik akııalar paketin tender jeńimpazy – "Temir qon" JShS-ǵa 105,3 mıllıon teńgege satty. Satyp alý-satý sharty zaýyt qyzmetiniń beıinin saqtaý, óndiris kólemin ulǵaıtý týraly talaptardy, sondaı-aq olardyń oryndalýyn baqylaý komıtetiniń quqyǵyn kózdedi. 2007 jylǵy sáýirde "Temir qon" JShS Bolat Nazarbaevqa AZTM jarǵylyq kapıtalynyń 86,78 paıyz akııasyn satqan. Onyń 31,9 paıyzy memlekettik paket boldy. Taǵy eki jyldan keıin Memlekettik múlik komıteti, "Temir qon" JShS jáne Bolat Nazarbaev 1998 jyly jasalǵan shart boıynsha tulǵalardy mindettemelerine aýystyrý týraly kelisim jasasty. Qujat eger Bolat Nazarbaev talaptardy oryndamasa, ol memlekettik akııalar paketin Komıtetke qaıtarýǵa mindetti ekenin kózdedi.
Biraq ol shart jasasqan kúnniń artynsha "PLS-TM" JShS akııalaryn ózgege satqan. Ári qujatta eshqandaı mindetteme kórsetilmeıdi. Osylaısha bul is qaıta qaralyp, naqty sheshim shyǵaryldy.
"Bolat Nazarbaev pen "PLS-TM"JShS arasynda jarǵylyq qordyń 31,9 paıyzyn quraıtyn "Almaty aýyr mashına jasaý zaýyty" AQ-nyń jaı ataýly akııalaryn satý bóliginde jasalǵan 2009 jylǵy 2 sáýirdegi baǵaly qaǵazdardy satyp alý-satý sharty jaramsyz dep tanylsyn. Bolat Nazarbaevqa "AZTM" AQ – nyń jaı ataýly akııalaryn zaýyttyń jarǵylyq kapıtalynyń 31,9 paıyzy mólsherinde memleket menshigine qaıtarýǵa mindettelsin", - delingen qaýlyda.
