"ەلدەگى ءماجىلىس سايلاۋىنا ۇمىتكەر ءسالافيد كانديداتتاردىڭ بەتى اشىلدى" - وراز الىمبەكوۆ

- سالافيلەردىڭ بەتى اشىلدى. «ستاندارتتى ەمەس كانديداتتار» 2,5 ملن نامازحانعا «ستاۆكا» قويدى

ءماجىلىس سايلاۋىنىڭ ءدىني-يدەولوگيالىق سيپاتى جونىندە بۇعان دەيىن جازىلعان. سايلاۋ الدىندا شەتەلدەن بەكبولات تىلەۋحان، مۇحامەدجان تازابەكوۆ، اينۇر تۇرسىنباەۆالاردىڭ قازاقستانعا كەلۋىنىڭ ءبىر سەبەبى رەتىندە ءماجىلىس سايلاۋىندا سالافيلىك كوزقاراستاعى كانديداتتاردى قولداۋ ەكەنى ايتىلدى. بۇل بولجامعا سەنبەي، كۇلكىگە اينالدىرعاندار دا بولعان. مىنە، ەندى سول ساياسي بولجام ءوزىنىڭ دالەلىن تاۋىپ جاتىر.

سالافيلىك كوزقاراستاعى كانديداتتاردىڭ ويىنشا، قازاقستاندا كۇندەلىكتى 5 ۋاق ناماز وقيتىن 1,5 – 2,5 ملن نامازحان بار ەكەن. مىناۋ كانديداتتار دەپۋتات بولسا، ءماجىلىس مىنبەرىنە شىعىپ الىپ نامازحانداردىڭ قۇقىقتارىن قورعايدى ەكەن. سول ءۇشىن «زايىرلىلىق. پارلامەنت. يسلام» اتتى ونلاين كونفەرەنتسيا وتكىزىپ جاتىر. ساقالدى ۇمىتكەرلەر وزدەرىن «ستاندارتتى ەمەس كانديداتتار» دەپ اتاپ، نامازحانداردى قازاقستاننىڭ باسقا ازاماتتارىنان ارتىق قويعىسى كەلە مە، قالاي ءوزى؟..

كونفەرەنتسيانىڭ اتاۋى دا قىزىق. «زايىرلىلىق» جانە «پارلامەنت» تۇسىنىگى بەلگىلى ءبىر ءدىني اعىمعا، سالافيلىك تۇسىنىكتەگى يسلامعا قالاي ۇيلەسەدى؟! بۇل «ەلدە 2,5 ملن نامازحان بار، سوندىقتان ولاردىڭ مۇددەسى ساياساتتا ەسكەرىلۋ كەرەك» دەپ زايىرلى قازاقستاندى ساياسي شانتاجدىڭ تەزىنە العىسى كەلە مە؟ اركىمنىڭ نانىم-سەنىمى كونستيتۋتسيادا قورعالعان.

- ءاربىر ازامات قانداي قۇدايعا سەنەتىنىن نەمەسە سەنبەيتىنىن ءوزى شەشەدى. ونىڭ ۇستىنە، مەملەكەت دىننەن بولىنگەن. سايكەسىنشە، ءدىني كوزقاراس نەگىزىندە ساياسي پارتيا قۇرۋعا بولمايدى، ءدىني كوزقاراسپەن ساياسي ۇگىت-ناسيحات جاساۋعا بولمايدى. مىنە، وسى پرينتسيپ زايىرلى مەملەكەتتىڭ ۇستانىمى. ال مىناۋ كانديداتتار دەپۋتات بولا قالسا زايىرلى زاڭداردىڭ بىلاي ىسىرىپ تاستاپ، ەلدە شاريعات زاڭىن ورناتقىسى كەلەتىن سياقتى. وسى سۇراقتارعا زاڭدىلىقتى قاداعالايتىن پروكۋراتۋرا مەن ورتالىق سايلاۋ كوميسسياسى زاڭ نەگىزىندە شۇعىل تۇسىنىكتەمە بەرۋى كەرەك، - دەدى اۆتور.