پرەزيدەنت قاسىم-جومارت توقاەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارحيۆ ءىسى جانە قۇقىققا قايشى كونتەنتتىڭ تارالۋىن شەكتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى, دەپ حابارلايدى «ادىرنا» ءتىلشىسى.
قۇجاتتا پەدوفيليانى جانە ءداستۇرلى ەمەس جىنىستىق باعداردى ناسيحاتتايتىن اقپاراتتى قوعامدىق كەڭىستىكتە، بۇقارالىق اقپارات قۇرالدارىندا، تەلەكوممۋنيكاتسيا جەلىلەرىندە جانە ونلاين-پلاتفورمالاردا ورنالاستىرۋدى شەكتەۋ كوزدەلگەن.
سەنات وكىلدەرىنىڭ ايتۋىنشا، زاڭنىڭ باستى ماقساتى — بالالاردىڭ قۇقىقتارىن قورعاۋ.
ايتا كەتەيىك، 12 قاراشادا ءماجىلىس دەپۋتاتتارى لگبت ناسيحاتىنا تىيىم سالاتىن زاڭدى قابىلداعان ەدى. نورمالار كۇشىنە ەنگەننەن كەيىن مۇنداي كونتەنتكە 18+ جاس شەكتەۋى بەلگىلەنىپ، ارنايى تاڭبالاۋ ەنگىزىلەدى. زاڭدى سەنات 4 جەلتوقساندا قاراۋى ءتيىس بولعانىمەن، قۇجات كۇن تارتىبىنەن الىنىپ تاستالدى. پالاتادا بۇل شەشىم جەكەلەگەن نورمالاردى قوسىمشا پىسىقتاۋ قاجەتتىلىگىمەن ءتۇسىندىرىلدى.
مادەنيەت جانە اقپارات مينيسترلىگى حالىقارالىق تاجىريبەنى زەردەلەپ، ۇقساس نورمالار جەكەلەگەن توپتارعا قاتىستى اگرەسسيانىڭ نەمەسە الەۋمەتتىك وقشاۋلانۋدىڭ وسۋىنە اكەلەدى دەگەن الاڭداۋشىلىقتارعا دالەل تاپپاعانىن مالىمدەدى. ۆيتسە-مينيستر ەۆگەني كوچەتوۆ باسقا مەملەكەتتەردە بۇدان دا قاتاڭ شەكتەۋلەر ەنگىزىلگەنىن، الايدا ول ەلدەردە تۇزەتۋلەردى سىناۋشىلار ايتىپ جۇرگەندەي تەرىس قوعامدىق رەاكتسيا قالىپتاسپاعانىن اتاپ ءوتتى.
18 جەلتوقساندا سەنات لگبت ناسيحاتىنا تىيىم سالۋ تۋرالى زاڭدى ماقۇلداعان ەدى.
