«اق جول» دەموكراتيالىق پارتياسى پارلامەنتتىك رەسپۋبليكاعا كوشۋدى جاقتايدى

2266
Adyrna.kz Telegram
فوتو: akzol.kz
فوتو: akzol.kz

«اق جول» دەموكراتيالىق پارتياسى پارلامەنتتىك رەسپۋبليكاعا كوشۋدى جاقتايدى. بۇل تۋرالى الماتىدا وتكەن پارتيا جاقتاستارىنىڭ ميتينگىسىندە ازات پەرۋاشەۆ مالىمدەدى، دەپ حابارلايدى “ادىرنا” ۇلتتىق پورتالى akzol.kz-كە سىلتەمە جاساپ.

«ءبىز پارلامەنتتىك رەسپۋبليكانى جاقتايمىز. ءبىر ادام، ءتىپتى ەڭ دارىندى بولسا دا، فيزيكالىق تۇرعىدان سىرتقى ساياسات پەن ماكروەكونوميكادان باستاپ جىلۋ جۇيەسىندەگى اپاتقا دەيىنگى ەلدەگى بارلىق ماسەلەلەرگە دەندەي المايدى. پرەزيدەنت توقاەۆتىڭ جىلۋسىز قالعان رۋدنىي تۇرعىندارىنىڭ جاعدايىمەن تانىسىپ قايتقانى - ونىڭ ادامگەرشىلىگى مەن ءار ادامنىڭ تاعدىرى ءۇشىن جاۋاپكەرشىلىگىن كورسەتەدى. دەگەنمەن، بۇل جەرگىلىكتى جەردەگى ماسەلەلەرمەن جەرگىلىكتى بيلىك اينالىسۋ كەرەك دەگەن قاعيدانى ودان بەتەر بەكىتە تۇسەدى. مۇنداعى باقىلاۋشى فۋنكتسياسىن سايلاۋشىلاردىڭ وكىلى بولىپ تابىلاتىن ماسليحات سەكىلدى ۇجىمدىق ورگان اتقارۋى قاجەت. ال، مۇنداي باقىلاۋ ناتيجەلى بولۋى ءۇشىن «تەجەۋ مەن تەپە-تەڭدىك جۇيەسى» دەپ اتالاتىن اتقارۋشى جانە وكىلدى بيلىك تارماقتارى اراسىندا بالانس بولۋى شارت. ورتالىق دەڭگەيدە دە سولاي - ۇكىمەتتىڭ قۇزىرەتى پارلامەنتتىڭ باقىلاۋ فۋنكتسيالارىمەن تەڭەستىرىلۋى كەرەك. سول كەزدە بۇل جۇيە جوعارىدان بۇيرىق كۇتپەي پروبلەمالارعا دەر كەزىندە نازار اۋدارىپ، ولاردىڭ شەشىلۋىن رەتتەپ، اعىمداعى رەجيمدە جۇمىس ىستەيدى. بۇل وزىق مەملەكەتتەر الدەقاشان ءبىر ىزگە سالعان پارلامەنتريزم جۇيەسى، دەموكراتيا نەگىزىندە دە ءدال سول جاتىر - دەپ اتاپ ءوتتى «اق جول» پارتياسىنىڭ توراعاسى.

ازات پەرۋاشەۆ مەملەكەت باسشىسى 2022 جىلدىڭ 16 ناۋرىزىندا كونستيتۋتسيالىق رەفورمانى جاريالاعاندا، وسى تەجەۋ مەن تەپە-تەڭدىك تۋرالى ايتقانىن ەسكە سالدى. ال 1 قىركۇيەكتەگى جولداۋىندا ق.توقاەۆتىڭ «كونستيتۋتسيالىق رەفورمانىڭ نەگىزگى مازمۇنى پارلامەنتاريزم ينستيتۋتىن كۇشەيتۋ مەن دامىتۋ» ەكەنىن ايتقان بولاتىن. ا. پەرۋاشەۆ «توقاەۆ فورمۋلاسى» دەپ اتاعان پرەزيدەنتتىڭ بەلگىلى تىركەسىن تىلگە تيەك ەتتى: مىقتى پرەزيدەنت - ىقپالدى پارلامەنت - ەسەپ بەرەتىن ۇكىمەت. 

پارلامەنتاريزم ۇلگىسى بولىپ ەۋروپالىق، كەڭىرەك ايتساق، باتىس ساياسي مودەلى، سوندىقتان «اق جول» پارتياسى دامۋدىڭ ەۋروپالىق جولىن، قوعام مەن مەملەكەت اراسىنداعى قارىم-قاتىناستاعى ەۋروپالىق تاسىلدەردى، ءومىر ساپاسىنىڭ ەۋروپالىق ستاندارتتارىن جاقتايدى.

«اق جول» دەمپارتياسىنىڭ ليدەرى پارلامەنتاريزمنىڭ باستى كريتەريى رەتىندە ۇكىمەتتى جاساقتاۋدى اتادى: ونى سايلاۋدا جەڭىسكە جەتكەن پارتيا جاساقتاۋى كەرەك. سوندا بۇل پارتيا ءوز ۇكىمەتىنىڭ جەتىستىكتەرى مەن كەمشىلىكتەرىنە دە جاۋاپتى بولادى.

پىكىرلەر