اۋعانستاننان 5 بالاسىمەن كوشىپ كەلگەن قازاق وتباسى قۇلاعالى تۇرعان ءۇيدى جالداپ تۇرىپ جاتىر

1882
Adyrna.kz Telegram

تۇركىستانعا اۋعانستاننان قونىس اۋدارعان ەتنيكالىق قازاق ازاماتىنىڭ  جۇپىنى تۇرمىس، جايسىز ورنى كوپشىلىكتىڭ كوڭىلىن ءتۇسىردى. ەلگە ات سابىلتىپ جەتكەن قانداستار نە ءارىپ تانىمايدى، نە ساناۋدى ءجوندى بىلمەيدى. كەلىنشەك ۆيدەودا ءوزىنىڭ ۇيگە دە كەلىڭكىرەمەيتىن "كەپەدە (لاشىق)" تۇرىپ جاتقانىن كورسەتىپ، اۋىر تۇرمىسىن باياندادى، دەپ حابارلايدى "ادىرنا" ۇلتتىق پورتالى. بۇل ماسەلە جايلى "KYN.KZ" سايتى جازدى.

ءۇي ەمەس، قامىسپەن جابىلعان جۇپىنى كەپە دەرسىڭ... تۇركىستاندا اۋعانستاننان كوشىپ كەلگەن 37  جاستاعى ماليكا ەسىمدى بەس بالانىڭ اناسى جۇپىنى لاشىقتا تۇرىپ جاتىر. قانداسىمىز ءۇي كەزەگىنە تۇرعان، دەگەنمەن كەزەك ەش جىلجىماعان كورىنەدى.

«مەنىڭ بەس بالام بار. قۇدايعا شۇكىر، بالالارىم ءارىپ تانيدى، وقيدى. قايىن اتامنىڭ اعايىندارى وسى قازاقستاندا ەدى. سولار باستاپ، اۋعانستاندا جاعداي قيىنداي باستاعان كەزدە ءبىزدى كوشىرىپ  اكەپ، ەلگە قوستى. ءوزىمنىڭ اتا- انام، ءتورت باۋىرىم اۋعانستاندا قالدى.

ولار ءتىپتى قازاق ءتىلىن ۇمىتىپ قالعان. باۋىرلارىم قازاقپەن ەمەس، اۋعاندارعا تۇرمىسقا شىعىپ، سول ەلدىڭ قىزدارىمەن وتاۋ قۇردى. تەلەفونمەن سويلەسىپ تۇرامىن. قازىر جاعدايلارى وتە قيىن. قايتەمىن كوشىرىپ الىپ كەلە المايمىن. جۇمىس تابۋ قيىن. ولاردىڭ جۇمىسى پاكەت ساتادى، كىرپىش قۇيادى، اربا سۇيرەيدى سونداي قارا جۇمىستار ىستەيدى.

ءبىر كۇنى نانعا اقشا تاپسا، ءبىر كۇنى ەشتەڭە جوق ولاردا. باۋىرلارىم تالىپتەر باسقارعالى زورلىق-زومبىلىق كوبەيگەنىن ايتادى. ەندى ونى كوزىممەن كورمەگەننەن كەيىن ەشتەڭە ايتا المايمىن. مەن اۋعانستاندا تۇرعاندا باسقا تاۋ بوكتەرىندە سول تالىپتەرمەن سوعىس ءجۇرىپ جاتتى. ناقتى ءبىز تۇراتىن ايماقتا سوعىس، اتىس بولعان جوق»،- دەيدى ايەل.

"KYN.KZ"سايتىنىڭ جازۋىنشا, ماليكا قازاقستانعا كوشىپ كەلىسىمەن ەشكىمنەن ەشقانداي اقشالاي كومەك الماعان. ويتكەنى بۇل وتباسىنى اعايىن- تۋىس اتسالىسىپ ءجۇرىپ ەلگە الدىرىپتى. ماليكا دا ونىڭ كۇيەۋى سايدحانان دا وقىماعان. قازا ءتىلىنىڭ ارىپتەرىن دە سانىن دا تانىمايدى. بار وتىنىشتەرى، ءۇي كەزەگى ەرتەرەك كەلسە دەيدى.

«ءبىز ءۇيدىڭ كەزەگىنە تۇرعانبىز، كەلگەن جىلى. ءوزىمىز ساۋاتسىز بولعاندىقتان تۇسىنەبەرمەيمىز. سۇراساق كەزەكتەرىڭ كەلمەدى دەيدى. مىناۋ قۇلاعالى تۇرعان ۇيگە ايىنا 50 مىڭ تەڭگە بەرەمىز. كۇيەۋىم كۇندەلىكتى جالدانىپ قارا جۇمىس ىستەيدى. ونىڭ بارلىعى وسى ءۇيدىڭ اقىسى، بالالاردىڭ كيىمى مەن تاماعىنان ارتىلمايدى»،-  دەيدى ايەل.

ماليكانىڭ قازىرگى تۇرمىس جاعدايى - جۇپىنى. اتاجۇرتىم دەپ ەلەڭدەپ ەلگە جەتكەن قانداس ءوز  ماسەلەسىنە اتقامىنەرلەردىڭ نازار اۋدارىپ، ماڭىز بەرەتىنىنە سەنىمدى.

"ادىرنا" ۇلتتىق پورتالى

 

 

پىكىرلەر