رەسەيدە قازاق بالالارى انا ءتىلىن مىندەتتى ءپان رەتىندە وقيدى

2827
Adyrna.kz Telegram

رەسەي ايماقتارىندا قازاق بالالارى انا ءتىلىن مىندەتتى ءپان رەتىندە وقۋعا مۇمكىندىك الدى. ول ءۇشىن التاي رەسپۋبليكاسىنىڭ قوساعاش مەكتەبىنىڭ ۇستازدارى ارنايى وقۋ-ادىستەمە ازىرلەدى. ولار دايىنداعان 1-4 سىنىپتارعا ارنالعان «الىپپە» مەن «قازاق ءتىلى»» وقۋلىقتارى ساراپتامادان ءوتتى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.

التايداعى قوساعاش اۋىلى مەكتەبىنىڭ مۇعالىمدەرى قازاق ءتىلى ءپانى بويىنشا باستاۋىش سىنىپتارعا ارنالعان وقۋ-ادىستەمەلىك كەشەندەرىن 2021 جىلى ازىرلەدى. ولار بارلىق دەڭگەيلەردە ساراپتامادان ءوتىپ، ەندى رەسەيلىك وقۋ باعدارلاماسىنا رەسمي تۇردە ەنگىزىلدى.

«ەگەر دە ءبىز فاكۋلتاتيۆ تۋرالى ايتىپ وتىرساق، بارعىسى كەلگەن بالالار بارادى، ساباققا بارعىسى كەلمەيتىن بالالار بارمايدى. سوندىقتان ءتىلدى ۇيرەنبەيدى. ال ءپان بولسا، بالالار مىندەتتى تۇردە بارادى، سوندىقتان تىلدەرى داميدى، انا تىلىندە ەركىن سويلەيدى. قازىرگى كۇندە اتا انالاردىق قازاق تىلىنە دەگە قىزىعۋشىلىعى وتە كوپ، سوندىقتان بالالارىن وقىتۋعا تىرىسادى»،—دەيدى قازاق ءتىلى مۇعالىمى باتكەن سارسەنوۆا.

ومبى قالاسىنىڭ 3 مەكتەبىنىڭ وقۋشىلارى انا ءتىلىن فاكۋلتاتيۆتى ساباق كەزىندە ۇيرەنە الادى. ال وبلىستىڭ 11 مەكتەبى قازاق ءتىلىن مىندەتتى ءپان رەتىندە وقىتادى.

«ءبىزدىڭ جەرگىلىكتى ومبى قازاقتارىن دياسپورا دەپ اتاۋعا بولمايدى، ويتكەنى ولار – وسى اۋماقتى ەجەلدەن مەكەندەگەن حالىق. ءبىزدىڭ وبلىستا ۇلتتىق مادەنيەتتى ساقتاۋ جانە ناسيحاتتاۋ ىسىنە كوپ كوڭىل بولىنەدى جانە جان-جاقتى قولداۋ كورسەتىلەدى»،—دەپ ءتۇسىندىردى ومبى وبلىسى وڭىرلىك ساياسات مينيسترلىگىنىڭ سەكتور مەڭگەرۋشىسى رۋستام گراسيمچۋك.

ومبى جانە التاي مۇعالىمدەرى جاڭا وقۋلىقتار رەسەيدىڭ باسقا دا مەكتەپتەرىندە قولجەتىمدى بولىپ، قازاق ءتىلىن وقىتاتىن ءبىلىم بەرۋ مەكەمەلەر جەلىسى كەڭەيەدى دەپ ۇمىتتەنەدى.

پىكىرلەر