Reseı aımaqtarynda qazaq balalary ana tilin mindetti pán retinde oqýǵa múmkindik aldy. Ol úshin Altaı respýblıkasynyń Qosaǵash mektebiniń ustazdary arnaıy oqý-ádisteme ázirledi. Olar daıyndaǵan 1-4 synyptarǵa arnalǵan «Álippe» men «Qazaq tili»» oqýlyqtary saraptamadan ótti, dep habarlaıdy «Adyrna» tilshisi «Habar 24»-ke silteme jasap.
Altaıdaǵy Qosaǵash aýyly mektebiniń muǵalimderi qazaq tili páni boıynsha bastaýysh synyptarǵa arnalǵan oqý-ádistemelik keshenderin 2021 jyly ázirledi. Olar barlyq deńgeılerde saraptamadan ótip, endi reseılik oqý baǵdarlamasyna resmı túrde engizildi.
«Eger de biz fakýltatıv týraly aıtyp otyrsaq, barǵysy kelgen balalar barady, sabaqqa barǵysy kelmeıtin balalar barmaıdy. Sondyqtan tildi úırenbeıdi. Al pán bolsa, balalar mindetti túrde barady, sondyqtan tilderi damıdy, ana tilinde erkin sóıleıdi. Qazirgi kúnde ata analardyq qazaq tiline dege qyzyǵýshylyǵy óte kóp, sondyqtan balalaryn oqytýǵa tyrysady»,—deıdi qazaq tili muǵalimi Batken Sarsenova.
Omby qalasynyń 3 mektebiniń oqýshylary ana tilin fakýltatıvti sabaq kezinde úırene alady. Al oblystyń 11 mektebi qazaq tilin mindetti pán retinde oqytady.
«Bizdiń jergilikti Omby qazaqtaryn dıaspora dep ataýǵa bolmaıdy, óıtkeni olar – osy aýmaqty ejelden mekendegen halyq. Bizdiń oblysta ulttyq mádenıetti saqtaý jáne nasıhattaý isine kóp kóńil bólinedi jáne jan-jaqty qoldaý kórsetiledi»,—dep túsindirdi Omby oblysy Óńirlik saıasat mınıstrliginiń sektor meńgerýshisi Rýstam Grasımchýk.
Omby jáne Altaı muǵalimderi jańa oqýlyqtar Reseıdiń basqa da mektepterinde qoljetimdi bolyp, qazaq tilin oqytatyn bilim berý mekemeler jelisi keńeıedi dep úmittenedi.
