وتكەن جىلى ەلىمىزدە 30 مىڭعا جۋىق قىز-كەلىنشەك العاش رەت جۇمىسقا تۇرعان. بۇل تۋرالى ەڭبەك جانە حالىقتى الەۋمەتتىك قولداۋ ءمينيسترى تامارا دۇيسەنوۆا ءمالىم ەتتى، دەپ حابارلايدى "ادىرنا" ۇلتتىق پورتالى.
«ەلىمىزدە جۇمىس ىستەيتىن 4,3 ملن ايەل بار. بۇل جۇمىسپەن قامتىلعان حالىقتىڭ 48% قۇرايدى. ايەلدەردىڭ 35% ساۋدا جانە قىزمەت كورسەتۋ سالاسىندا، 32% ءبىلىم، دەنساۋلىق ساقتاۋ جانە عىلىم سالاسىندا، 14% ونەركاسىپتە، قۇرىلىستا جانە كولىكتە، 9% استامى اۋىل شارۋاشىلىعىندا ەڭبەك ەتىپ جاتىر. وڭىرلەردە دە ايەلدەردى ناتيجەلى جۇمىسپەن قامتۋ بويىنشا دا بەلسەندى جۇمىس ءجۇرىپ جاتىر. ماسەلەن، بىلتىر 536 مىڭ ايەل ادام جۇمىسقا ورنالاستىرىلدى. ال بيىل ەكى ايدا 92 مىڭنان استام ايەل جۇمىسقا تۇردى»، – دەدى تامارا دۇيسەنوۆا ۇكىمەت وتىرىسىندا.
سونداي-اق، مينيستر جاس ايەلدەردى مەملەكەتتىك سۋبسيديا ەسەبىنەن جۇمىسقا ورنالاستىرۋ جوعارى قارقىنمەن ىسكە اسىپ جاتقانىن ايتتى.
ونىڭ مالىمەتىنشە، وتكەن جىلى 30 مىڭعا جۋىق ايەل العاش رەت جۇمىسقا ورنالاسقان.
«مەملەكەتتىك قولداۋ بويىنشا تاعى ءبىر ماڭىزدى شارا قىز-كەلىنشەكتەرگە ءوز ءىسىن اشۋعا جاعداي جاساۋ. وتكەن جىلى 80 مىڭعا جۋىق ايەل كاسىپكەرلىك نەگىزدەرى كۋرسىنان ءوتتى. ونىڭ قورىتىندىسى بويىنشا 13 مىڭعا جۋىق ايەل گرانت الدى. ونىڭ 58% تاۋارلار مەن قىزمەتتەردى وندىرۋگە قاجەتتى تەحنولوگيالىق جابدىقتار ساتىپ الدى. ال 31% مال ساتىپ الدى»، – دەيدى ۆەدومستۆو باسشىسى.
"ادىرنا" ۇلتتىق پورتالى
