قازاقستانداعى تۇڭعىش كاسىبي ديريجەر ايەل رايسا سادىقوۆا بۇگىن 80 جىلعا تولار ەدى، دەپ حابارلايدى "ادىرنا" ۇلتتىق پورتالى.
رايسا سادىقوۆا 1944 جىلى الماتى وبلىسىندا تۋعان.
ءبىرتۋار تۇلعا كوزى تىرىسىندە قازاق ۇلتتىق اسپاپتىق وركەسترىنىڭ ءارتىسى بولىپ جۇمىس ىستەدى. ول بىرنەشە جىل بويى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى بولعان.
قازاقتان شىققان تۇڭعىش ديريجەر ايەلدىڭ رەپەرتۋارىندا سيمفونيالىق مۋزىكانىڭ جاۋھارلارى، وپەرا جانە بالەت سپەكتاكلدەرى، قازاق كلاسسيكاسىنىڭ ءىنجۋ-مارجاندارى بولدى. ونەر يەسى تەك سيمفونيالىق وركەسترگە ديريجەرلىق ەتىپ قانا قويمادى. سونداي-اق، ول «وتىرار سازى» فولكلورلىق-ەتنوگرافيالىق وركەسترىنە جانە قۇرمانعازى اتىنداعى قازاق حالىق اسپاپتار وركەسترىنە دە ديريجەرلىك ەتتى. ودان بولەك، كوپتەگەن جىلدار بويى الماتىداعى قۇرمانعازى اتىنداعى كونسەرۆاتوريادا پەداگوگيكالىق قىزمەت اتقاردى.
رايسا سادىقوۆا سيمفونيالىق وركەستردىڭ العاشقى كاسىبي ايەل ديريجەرى رەتىندە تاريحتا قالدى. ديريجەرگە ەرەن ەڭبەگى ءۇشىن «قازاقستان رەسپۋبليكاسىنىڭ ەڭبەك سىڭىرگەن قايراتكەرى» اتاعى بەرىلدى.
ەرەكشە تالانت يەسى 2020 جىلى 76 جاسىندا ومىردەن ءوتتى.
