سوڭعى جىلدارى قازاق عىلىمىنا دەگەن كوزقاراس تۇبەگەيلى وزگەردى. وعان قاسىم-جومارت توقاەۆتىڭ عىلىم سالاسىنا جاساعان رەفورمالارى سەپ بولدى. عالىمداردىڭ جالاقىسى ءوسىپ، جاس عالىمداردى قولداۋ شاراسى كەڭەيدى جانە عىلىمدى دامىتۋعا بولىنەتىن قاراجات كولەمى ەداۋىر ارتتى. سالا عىلىمعا قاتىسى جوق ادامداردان تازارىپ، ناعىز جانى اشيتىن، ءومىرىن وسى سالاعا ارناعان ادامدارمەن تولىقتى.
سوڭعى دەرەكتەرگە سۇيەنسەك، ەلىمىزدە عىلىمي زەرتتەۋ جۇمىستارىن جۇزەگە اسىراتىن 438 مەكەمە بار كورىنەدى. وندا 21 617 عالىم قىزمەت اتقارادى ەكەن. بۇل قازاق عىلىمى ءۇشىن ۇلكەن جەتىستىك دەۋگە بولادى. سەبەبى عىلىمدى قارجىلاندىرۋ كولەمى سوڭعى ءۇش جىلدا 70 پايىزعا وسكەن.
سونداي-اق بالالار عىلىمىنا دا ەرەكشە نازار اۋدارىلۋدا. اسىرەسە، بۇل باعىتتا ماقتاناتىن تۇسىمىز كوبىرەك. ماسەلەن، ەلىمىزدە وتكەن «Central Asia FIRST CHAMPIONSHIP-2023» روبوتوتەحنيكادان ورتالىق ازيا ويىندارىنا 1 200 وقۋشىنىڭ قاتىسۋى سالا بولاشاعىنىڭ جارقىن ەكەنىن دالەلدەيدى. سونىمەن قاتار 50 وقۋشىمىز الەمنىڭ ءتورت ەلىندە (اۆستراليا، ماروككو، اقش، ينديا) وتەتىن حالىقارالىق باسەكەلەرگە جولداما العان. جالپى، قاي سالاعا بولماسىن قىزىعۋشىلىق بالا كەزدەن پايدا بولاتىنىن ەسكەرسەك، باعىت بار، باعدار بەلگىلى.
بۇگىنگى تاڭدا جەلىنى اشىپ قالساڭ بولدى ەلىمىزدىڭ تۇكپىر-تۇكپىرىندە عىلىمدا العاشقى جەتىستىكتەرىنە قول جەتكىزىپ جاتقان جەتكىنشەكتەردى كورۋگە بولادى. ولاردى كورىپ قازاق عىلىمىنىڭ ەرتەڭىن ەلەستەتەسىڭ. ءىشىڭ جىليدى. كۇنى بۇگىن بىرەۋىن كوزىم شالدى. تارازدىق وقۋشى تالىمگەرىنىڭ جەتەكشىلىگىمەن قىزىل جالىندى سوندىرۋگە ارنالعان روبوت ويلاپ تاۋىپتى. ول ءتىپتى قاپتاعان قالىڭ ءتۇتىن اراسىندا قالىپ قويعان ادامدى ەركىن الىپ شىعاتىنعا ۇقسايدى. روبوتتى الىس قاشىقتىقتان باسقارۋعا دا بولادى ەكەن. مىنە، تاپقىرلىق. نەبارى 9-سىنىپ وقيتىن وقۋشىنىڭ العىرلىعى. بۇل جوبا بولاشاقتا جەتىلدىرىلسە، تالاي جاندى ولىمنەن اراشالاپ قالۋى ءسوزسىز. ال ەندى اقتوبەلىك وقۋشىلار «اقىلدى تەرەزە» ويلاپ تاپقان. ولاردىڭ جاساعان جۇمىستارى بۇگىنگى تاڭدا وتە ماڭىزدى دەۋگە بولادى. ويتكەنى كىشكەنتاي بالالاردىڭ تەرەزەدەن قۇلاۋ جاعدايى جيىلەپ كەتكەنى راس. «اقىلدى تەرەزە» جوباسى بۇل ماسەلەنىڭ شەشىمى بولارى انىق. سەبەبى «اقىلدى تەرەزە» وزىنە جاقىن 90 سم ارالىقتا دىبىس ەستىسە قۇلىپتالىپ قالادى. بۇل بالانىڭ تەرەزەنىڭ جاقتاۋىنا ورمەلەپ جاتقاندىعىنىڭ بەلگىسى. ماسەلەنىڭ وڭاي ءارى اقىلدى شەشىمى دەپ وسىنى ايت.
بۇل قازاق بالالار عىلىمىنىڭ بۇرىن-سوڭدى شىقپاعان بەلەسى. شۇكىر، دەيمىز. بالالارىمىز كىشكەنتاي كەزىنەن عىلىمنىڭ نە ەكەنىن ءبىلىپ وسەتىن جاعدايعا جەتتىك. جەتىستىك وڭاي كەلمەدى. تالاي تەر توگىلىپ، قىرۋار قارجى جۇمسالدى. قازىرگى تاڭدا ەلىمىزدىڭ ءار ايماعىندا بالالاردىڭ عىلىممەن اينالىسۋىنا كەرەكتى جاعداي جاسالعان. زاماناۋي ورتالىقتار سالىنعان. ورتالىقتاردا بالالاردىڭ كىشكەنتاي بولسا دا ماڭىزدى جاڭالىقتارىنىڭ كۋاسى بولىپ جاتىرمىز. مۇنىمەن توقتامايمىز دەپ سەنەمىز. قازاق عىلىمى جاسارا بەرسىن!
