"ۇلتتىق قۇرىلتاي - پرەزيدەنت جانىنداعى نەگىزگى كونسۋلتاتيۆتىك-كەڭەسشى ورگان". بۇل پىكىردى مەملەكەتتىك كەڭەسشى ەرلان قارين ءوزىنىڭ تەلەگرام ارناسىندا جازدى، دەپ حابارلايدى "ادىرنا" ۇلتتىق پورتالى.
"ۇلتتىق قۇرىلتاي - پرەزيدەنت جانىنداعى نەگىزگى كونسۋلتاتيۆتىك-كەڭەسشى ورگان. مەملەكەت باسشىسى بۇل ۇيىمدى قۇرۋ تۋرالى باستامانى وتكەن جىلعى جولداۋىندا كوتەرگەن بولاتىن. ۇلتتىق قۇرىلتايدىڭ قۇرامىنا ەلىمىزگە بەلگىلى قوعام قايراتكەرلەرى جانە ساراپشىلارمەن قاتار، وڭىرلەردەگى ازاماتتىق قوعامنىڭ بەلسەندى وكىلدەرى مۇشە بوپ كىردى. قازىرگى ۋاقىتتا ۇلتتىق قۇرىلتاي مەملەكەت باسشىسىنىڭ قوعام بەلسەندىلەرىمەن جانە ساراپشىلارمەن اراداعى تىكەلەي ديالوگىن ورناتىپ، ونى دامىتىپ وتىر. مىسالى، بۇگىن پرەزيدەنت ۇلتتىق قۇرىلتايدىڭ مۇشەسى، قولدانبالى ەتنوساياسي زەرتتەۋلەر ينستيتۋتىنىڭ ديرەكتورى تالعات قاليەۆپەن كەزدەستى. كەزدەسۋدە ساراپتامالىق قۇرىلىمداردىڭ جۇمىسى مەن قولدانبالى زەرتتەۋلەر جۇرگىزۋگە قاتىستى ماسەلەلەر تالقىلاندى. بۇعان دەيىن پرەزيدەنت ۇلتتىق قۇرىلتايدىڭ ت. اۋباكىروۆ، س. اقىلباي، ا. بايمەنوۆ، ر. باتالوۆ، ب. ىزمۇحامبەتوۆ، ج. كۇلەكەەۆ، س. حۋدياكوۆ، ي. سالجانوۆ، د. تۇرلىحانوۆ سەكىلدى باسقا دا مۇشەلەرىمەن ءدال وسىنداي كەزدەسۋلەر وتكىزگەن بولاتىن", - دەپ جازدى ەرلان قارين.
مەملەكەتتىك كەڭەسشى بىلتىرعى جىلدىڭ جەلتوقسان ايىندا Quryltai ءموبيلدى قوسىمشاسى ىسكە قوسىلعانىن ءمالىم ەتتى.
"ازاماتتار بۇل پلاتفورماعا قوعامداعى وزەكتى ماسەلەلەر جونىندەگى ءوز ويلارى مەن ۇسىنىستارىن جولداي الادى. بۇدان بولەك، «حابار» تەلەارناسىندا «ۇلتتىق قۇرىلتاي» اتتى ارنايى باعدارلاما كورسەتىلەدى. وعان ءار كەزدە ءارتۇرلى ءوڭىر قوسىلادى. باعدارلامادا ۇلتتىق قۇرىلتاي مۇشەلەرى مەن ساراپشىلار ەلىمىزدى دامىتۋعا ىقپال ەتەتىن ۇسىنىستاردى تالقىلايدى. سولايشا، ۇلتتىق قۇرىلتاي ەلدىڭ ءوتىنىش-تىلەكتەرىن جينايتىن كوممۋنيكاتسيانىڭ ءارتۇرلى فورماتتارىن پايدالانۋ ارقىلى اشىق ءارى ءتيىمدى ديالوگ الاڭىنا اينالۋدا", - دەپ جازدى ساياساتكەر.
"ادىرنا" ۇلتتىق پورتالى
