"Ulttyq quryltaı - Prezıdent janyndaǵy negizgi konsýltatıvtik-keńesshi organ". Bul pikirdi Memlekettik keńesshi Erlan Qarın óziniń telegram arnasynda jazdy, dep habarlaıdy "Adyrna" ulttyq portaly.
"Ulttyq quryltaı - Prezıdent janyndaǵy negizgi konsýltatıvtik-keńesshi organ. Memleket basshysy bul uıymdy qurý týraly bastamany ótken jylǵy Joldaýynda kótergen bolatyn. Ulttyq quryltaıdyń quramyna elimizge belgili qoǵam qaıratkerleri jáne sarapshylarmen qatar, óńirlerdegi azamattyq qoǵamnyń belsendi ókilderi múshe bop kirdi. Qazirgi ýaqytta Ulttyq quryltaı Memleket basshysynyń qoǵam belsendilerimen jáne sarapshylarmen aradaǵy tikeleı dıalogyn ornatyp, ony damytyp otyr. Mysaly, búgin Prezıdent Ulttyq quryltaıdyń múshesi, Qoldanbaly etnosaıası zertteýler ınstıtýtynyń dırektory Talǵat Qalıevpen kezdesti. Kezdesýde saraptamalyq qurylymdardyń jumysy men qoldanbaly zertteýler júrgizýge qatysty máseleler talqylandy. Buǵan deıin Prezıdent Ulttyq quryltaıdyń T. Áýbákirov, S. Aqylbaı, A. Baımenov, R. Batalov, B. Izmuhambetov, J. Kúlekeev, S. Hýdıakov, I. Saljanov, D. Turlyhanov sekildi basqa da múshelerimen dál osyndaı kezdesýler ótkizgen bolatyn", - dep jazdy Erlan Qarın.
Memlekettik keńesshi byltyrǵy jyldyń jeltoqsan aıynda Quryltai mobıldi qosymshasy iske qosylǵanyn málim etti.
"Azamattar bul platformaǵa qoǵamdaǵy ózekti máseleler jónindegi óz oılary men usynystaryn joldaı alady. Budan bólek, «Habar» telearnasynda «Ulttyq quryltaı» atty arnaıy baǵdarlama kórsetiledi. Oǵan ár kezde ártúrli óńir qosylady. Baǵdarlamada Ulttyq quryltaı músheleri men sarapshylar elimizdi damytýǵa yqpal etetin usynystardy talqylaıdy. Solaısha, Ulttyq quryltaı eldiń ótinish-tilekterin jınaıtyn kommýnıkaııanyń ártúrli formattaryn paıdalaný arqyly ashyq ári tıimdi dıalog alańyna aınalýda", - dep jazdy saıasatker.
"Adyrna" ulttyq portaly
