جاڭا قازاقستانعا قوش كەلدىك پە؟

2363
Adyrna.kz Telegram
فوتو: Facebook
فوتو: Facebook

سونىمەن، رەفەرەندۋم ءوتتى. كونستيتۋتسيا وزگەردى.

كەشە سايلاۋ ۋچاسكەلەرىنە حالىق جاقسى كەلدى. سانالى كەلدى. جۇرتتىڭ جۇزىنەن ءۇمىت كوردىم. بولاشاققا دەگەن سەنىم جەتەلەپ كەلگەن ميلليونداعان ادامنىڭ ءۇمىتى اقتالسا ەكەن…

الايدا ءبىر ادامنىڭ باستاماسى نەمەسە باستى ەرەجەنىڭ وزگەرگەنى ءۇمىتتى اقتاپ بەرمەيدى.

داۋىس بەرۋگە كەلگەن ميلليونداعان ادام اتا زاڭداعى وزگەرىس سياقتى وزگەرۋگە ءتيىس.

وزگەرىس نەدەن باستالۋعا ءتيىس؟ مەنىڭشە، باستى وزگەرىس زاڭعا باعىنۋدان باستالۋى ءتيىس. زاڭ بارىنە بىردەي. زاڭ ۇستەم. ايتالىق، كولىكتە بەلدىك تاعۋ كەرەك پە؟ جىلدامدىقتى ساقتاۋ كەرەك پە؟ “سەرگەككە” ءتۇسىپ قالام نەمەسە ايىپپۇل سالادى دەگەن قورقىنىشتان زاڭعا باعىنباۋ كەرەك، ادامنىڭ ىشكى مادەنيەتى سوعان جىبەرمەۋ كەرەك. كەز كەلگەن ەلدە وسىنداي ميلليونداعان ەرەجە بار. ادامنىڭ ىشكى مادەنيەتى ورتاق ەرەجەگە باعىندىرماسا، ارقايسىنىڭ باسىندا “سەرگەك” تۇرعان جوق.

بارلىق ازامات، قوعامداعى مارتەبەسىنە قاراماي، مەيلى ول پرەزيدەنت بولسىن، مەيلى ول اۋلا سىپىرۋشى بولسىن، قابىلدانعان ەرەجەنى ساقتاپ ءومىر سۇرمەسە، ەلدە ەشقانداي وزگەرىس بولمايدى.

ەلەستەتشى، الاڭداعى 22 فۋتبولشى ورتاق ەرەجەگە باعىنباي ويناسا نە بولماق؟! حاوس بولادى.

سوندىقتان، باستى ەرەجە - كونستيتۋتسيا وزگەرگەننەن اربىرىمىزدەن كۇتىلەتىن تالاپ - زاڭعا سايكەس، ۇيات-ار كومپاسىنا سايكەس ءومىر ءسۇرۋ. سوندا عانا شىنايى وزگەرىس بولادى. سوندا عانا جاڭا قازاقستان تۋادى.

كونستيتۋتسيا وزگەردى، ەندى ءبارى وزگەرىپ كەتەدى ەكەن دەگەن جالعان ۇمىتتەن ساقتاندىرعىم كەلەدى. كونستيتۋتسياداعى وزگەرىسكە داۋىس بەرۋ - بۇل ءسىز ىستەيتىن ەڭ وڭاي جۇمىس، مينيمۋم، تاۋعا شىعارداعى العاشقى قادام. ال ۇلكەن جۇمىس الدا. اسۋلار الدا. بۇل - كۇندەلىكتى جۇمىس، وزىمىزبەن جۇرگىزەتىن ىشكى جۇمىس.

شىڭعىس مۇقان،

شىمكەنت قالاسى اكىمىنىڭ ءبىرىنشى ورىنباسارى

پىكىرلەر