مالىك عابدۋللين مۋزەيىنىڭ قىزمەتكەرلەرى الماتى قالاسىندا "مالىكتىڭ رۋحى حالىقپەن" اتتى تانىمدىق-تاعىلىمدىق ەكسپەديتسيا ۇيىمداستىردى، دەپ جازادى “ادىرنا” ۇلتتىق پورتالى.
ءىس-ساپاردىڭ العاشقى كۇنى ەكسپەديتسيا مۇشەلەرى م.عابدۋلليننىڭ ءومىرى مەن شىعارماشىلىعىن، قوس باتىردىڭ ەرلىك جولى مەن دوستىق قارىم-قاتىناسىن جاس ۇرپاققا ۇلگى ەتۋ ماقساتىندا باۋىرجان مومىشۇلى اتىنداعى "جاس ۇلان" رەسپۋبليكالىق مەكتەبىندە "اعالى-ءىنىلى قوس باتىر، قيامەتتىك دوس باتىر" اتتى كەش وتكىزدى.
ەكسپەديتسيالىق توپ مۇشەلەرىن "جاس ۇلان" رەسپۋبليكالىق مەكتەبىنىڭ باسشىسى پودپولكوۆنيك نۇرلىحان ساتبايۇلى جىلى شىرايمەن قارسى الدى. سونداي-اق مەكتەپ كلۋبىنىڭ باسشىسى قاجىمۇقان ماعازبەكۇلى مەكتەپتىڭ تىنىس-تىرشىلىگى، باۋىرجان مومىشۇلىنىڭ تۇلعاسى دارىپتەلەتىن مەكتەپ مۇراجايىمەن تانىستىردى.
كەش بارىسىندا م.عابدۋلليننىڭ ونەگەلى ءومىر جولىنان سىر شەرتەتىن "عاجايىپ ءومىر باسپالداقتارى" اتتى جىلجىمالى كورمە تانىستىرىلىپ، "مالىك عابدۋللين مەن باۋىرجان مومىشۇلى اراسىنداعى رۋحاني بايلانىس كەزەڭدەرى" تاقىرىبىندا ءدارىس وقىلدى. كوپشىلىك قاۋىمعا مالىك باتىردىڭ "قازاق بالاسى" قولجازباسى تۋرالى باياندالدى.
وسىلايشا كوكشەتاۋداعى مالىك باتىر مۋزەيىندە "جۇلدىزسىز باتىر" اتانعان باۋىرجاننىڭ تۇلعاسى قالاي ناسيحاتتالسا، بۇگىن الماتىنىڭ تورىندە قوس باتىردىڭ ەرلىگى مەن دوستىعىن تەڭدەي ناسيحاتتاۋدىڭ ءساتى ءتۇستى. رەسپۋبليكالىق مەكتەپتىڭ تۇلەكتەرى باۋىرجان مومىشۇلىنىڭ دا تۇلعالىق وبرازىن كوتەرىپ جۇرگەن مۋزەي قىزمەتكەرلەرىنىڭ ەڭبەكتەرىنە كوزدەرى قۋانىپ، كوڭىلدەرى ءسۇيسىندى.
ءىس-شارا سوڭىندا مەكتەپ مۇراجايىنا ەستەلىك سىيلىقتار تابىستالدى. مەكتەپ ۇجىمى باۋىرجان مومىشۇلىنىڭ دا تۇلعالىق وبرازىن كوتەرىپ جۇرگەن مۋزەي قىزمەتكەرلەرىنىڭ ەڭبەگىنە ريزاشىلىقتارىن ءبىلدىردى.
”ادىرنا” ۇلتتىق پورتالى
