شىمكەنتتە قالانىڭ ساۋلەتىن اشىپ، دەمالۋعا ارنالعان گۇلزارلار سانى تاعى بىرەۋىمەن تولىعادى. جاڭا نىسان ساۋلە شاعىناۋدانىناندا سالىنادى دەپ جوسپارلانعان. «كىلت» دەپ اتالاتىن گۇلزاردىڭ قۇرىلىسى وسى جىلى باستالادى. بۇل تۋرالى شىمكەنت قالالىق جايلى ورتانى دامىتۋ باسقارماسى حابارلادى.
قازىرگى تاڭدا شاھاردا اتالعان مەكەمەگە قاراستى 9 ساياباق، 39 گۇلزار مەن اللەيا، 50 ەسكەرتكىش، 44 ۇڭعىما، 37 سۋبۇرقاق بار.
سالاعا جاۋاپتىلاردىڭ ايتۋىنشا، وتكەن جىلدىڭ قاراشا-جەلتوقسان ايلارىندا قالا اۋماعىنداعى باسقارماعا قاراستى قالانىڭ ساياباقتارى مەن گۇلزارلارىنا 4000 دانا اعاش كوشەتتەرى وتىرعىزىلىپ، كوگالداندىرىلعان. ال قاڭتار ايىندا 75 641 دانا قىزعالداقتىڭ كوشەتتەرى ەگىلگەن.
سونداي-اق، 8 ساياباق، 27 گۇلزار، 33 سۋبۇرقاق پەن 33 ەسكەرتكىشتىڭ مەملەكەتتىك تىركەۋ اكتىلەرىن قايتا تىركەۋ جۇمىستارى جۇرگىزىلىپ قۇجاتتاندىرىلعان. 12 گۇلزار، 17 ەسكەرتكىش، 5 سۋبۇرقاقتىڭ جەرگە ورنالاستىرۋ قۇجاتتارى دايىن. ولارعا مەملەكەتتىك اكت الۋ ءۇشىن باسقا دا قۇجاتتارى راسىمدەلۋدە. بۇعان قوسا 37 سۋبۇرقاققا كونسەرۆاتسيا (قۇرۋ، جيناۋ) جۇمىستارى جاسالىنىپتى.
بيىلعى جىلى دا ساياباقتار مەن گۇلزارلاردى كۇتىپ ۇستاۋ جۇمىستارى جوسپارعا ساي جۇرگىزىلەتىن بولادى.
