"Adamdyq qaıda, aǵalar?" degen saryndaǵy oqýshy qyzdyń saýaly qazaq dalasyn kezip júrgendeı. Semeı qalasy, №23 mekteptiń 8-synyp oqýshysyn avtobýs júrgizýshisi men kondýktor qaqaǵan sýyqta jolda qaldyrdy. "Adamdyqtan bezgen aǵalardyń" áreketine kúlli oqyrman narazylyq tanytyp otyr. Oqýshy qyzdyń sýyqtan uıaly telefony óship, qas qaraıǵanda bir ózi dalada qalǵan, dep jazdy "Adyrna" ulttyq portaly.
Avtobýstaǵy bezbúırekterdiń baıypsyz áreketi jaıly jýrnalıst Azamat Qasym jazdy:
- Búgin Semeıde mynadaı jaǵdaı bolypty.Qaladaǵy N23 mekteptiń 8-synybynda oqıtyn qyz sabaqtan shyǵyp, N25 marshrýttaǵy avtobýsqa otyrypty. Kondýktorǵa myń teńge berse, "zdacha joq" dep kelesi aıaldamadan túsirip ketipti. Baıǵus bala eki-úsh aıaldama jaıaý júrip, oǵan qosa sotkasy óship, ázer degende anasyna zvondapty. "Qyzym ábden tońyp qalypty. Taksımen baryp, úıge alyp keldim. Áıteýir, aman-esen ǵoı dep úndemedim" deıdi qyzdyń anasy, - dep jazdy avtor.
Jýrnalıstiń jazýynsha, ar men adamdyq sanadan jurdaı azamat oryssha sóılep, oqýshynyń qaýipsizdigine de qaraılamaǵan.
- Anasynan suraǵanda aıtqany: oqýshy saǵat 5-ter shamasynda Pestelıa kóshesinen Tatkraı jaqqa barmaq bolǵan. "Kondýktor oryssha sóıledi, er adam" depti qyz. Osy jaǵdaıǵa baılanysty qala ákimi Nurbol Nursaǵatov N25 baǵyttaǵy avtobýstyń kondýktoryna shara qoldansa, avtobýs parki basshylyǵyna eskertý jasasa degen ótinish bar. Mundaı jaǵdaı bolashaqta qaıtalanbas úshin. Jaýap kútemiz, - dep jazdy jýrnalıst.
Azamat Qasymnyń jantúrshiktirer jazbasyna Semeı qalasy ákimdigi resmı jaýap berdi. Olar:
- Sálemetsiz be! №25 marshrýttaǵy qoǵamdyq kólikke"AvtoTransSeme" JShS qyzmet kórsetedi. Ákimdik tarapynan tasymaldaýshy kásiporynǵa kondýktorǵa qatysty sharalar qabyldaý týraly habarlama jiberildi. Qoǵamdyq kólik qyzmetkerine qatysty qabyldanǵan sharany qosymsha habarlaımyz.
Sondaı-aq, ákimshilik Kodekstiń 571 jáne 685-baptaryna sáıkes avtomobıl kóligimen jolaýshylar men bagajdy tasymaldaý erejelerin buzý boıynsha aıyppul salýǵa polıııa basqarmasy quqyly, - dep jaýap jazdy.
"Adyrna" ulttyq portaly
