قاۋلىدا تومەندەگىدەي باعىتتارعا باسىمدىق بەرىلىپ، قازاق تاراپى ونىڭ زارارىن تەكسەرىپ وتىراتىنى جەتكىزىلگەن:
- جەرگىلىكتى اتقارۋشى ورگاندار مەن شارۋاشىلىق باسشىلارىن تاسىمالداعىش زىمىراننىڭ الداعى ۇشىرىلۋى تۋرالى قۇلاقتاندىرۋ;
- تاسىمالداعىش زىمىراندى ۇشىرۋ الدىندا قۇلاۋ اۋدانىن شولىپ بايقاۋ جانە تاسىمالداعىش زىمىراندى ۇشىرۋدى جۇرگىزۋ كەزەڭىندە قۇلاۋ اۋدانىن ۋاقىتشا جابۋ;
- تاسىمالداعىش زىمىراندى ۇشىرۋ جۇزەگە اسىرىلعان سوڭ تۇرعىنداردى (بار بولسا) قۇلاۋ اۋدانىنان ەۆاكۋاتسيالاۋ جانە ولاردى قايتارۋ;
- تاسىمالداعىش زىمىراننىڭ بولىنەتىن بولىكتەرىنىڭ فراگمەنتتەرىن ىزدەستىرۋ;
- تابىلعان سۇيىقتىقتى زىمىران قوزعالتقىشتارىن (نەمەسە ولاردىڭ فراگمەنتتەرىن) جانە تاسىمالداعىش زىمىراننان بولىنەتىن بولىكتەرىنەن قۇرامىندا باعالى مەتالدارى بار بۇيىمداردى (نەمەسە ولاردىڭ فراگمەنتتەرىن) ۇشىرۋدى جۇرگىزەتىن ۇيىمعا قايتارۋ;
- جانۋارلار دۇنيەسىنە جانە وسىمدىك جابىنىنا اسەردى تومەندەتۋ ماقساتىندا ءورت قاۋىپسىزدىگى تالاپتارى مەن نورماتيۆتەرىن ساقتاۋ;
- تاسىمالداعىش زىمىراننىڭ بولىنەتىن بولىكتەرى جەرگە تۇسكەن كەزدە ءورت تۋىنداعان جاعدايدا دالا ورتتەرىن بارىنشا تەز جويۋ;
- تاسىمالداعىش زىمىراننىڭ بولىنەتىن بولىكتەرىنىڭ فراگمەنتتەرىنەن قۇلاۋ اۋدانىن ۋاقتىلى تازالاۋ (بولىنەتىن بولىكتەر سورعا قۇلاعان كەزدە ولاردى قۇلاۋ اۋدانىنان قىسقى كەزەڭدە ەۆاكۋاتسيالاۋعا جول بەرىلەدى);
- تاسىمالداعىش زىمىراننىڭ بولىنەتىن بولىكتەرى قۇلاعان جەرلەردە لاستانعان ۋچاسكەلەردى دەتوكسيكاتسيالاۋ (قاجەت بولعان كەزدە) جانە بۇزىلعان توپىراق جابىنىن تەحنيكالىق رەكۋلتيۆاتسيالاۋ (تەگىستەۋ);
- "بايقوڭىر" عارىش ايلاعىنىڭ پوزيتسيالىق اۋدانى قورشاعان ورتاسىنىڭ جاي-كۇيىنە تاسىمالداعىش زىمىرانداردى دايىنداۋ جانە ۇشىرۋ اسەرىن باعالاۋ;
- قۇلاۋ اۋدانىندا جانە شەكتەس اۋماقتا ورنالاسقان ەلدى مەكەندەردىڭ قورشاعان ورتاسىنىڭ جاي-كۇيىنە تاسىمالداعىش زىمىراننىڭ بولىنەتىن بولىكتەرىنىڭ قۇلاۋ اسەرىن باعالاۋ;
- قۇلاۋ اۋدانىندا جانە شەكتەس اۋماقتا فلورا مەن فاۋنانىڭ جاي-كۇيىن جىل سايىنعى مونيتورينگتەۋ;
- بەس جىلدا ءبىر رەت نەمەسە قۇلاۋ اۋدانىن پايدالانۋ مەرزىمى اياقتالعان سوڭ قۇلاۋ اۋدانى مەن شەكتەس اۋماقتىڭ قورشاعان ورتاسىنىڭ جاي-كۇيىنە تاسىمالداعىش زىمىرانداردى ۇشىرۋدىڭ اسەرىن كەشەندى باعالاۋ.
وسى قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.
"ادىرنا" ۇلتتىق پورتالى
