قازاقستاننىڭ سىرتقى ىستەر مينيسترلىگى تۇركياداعى ءزىلزالادا قازا تاپقان جانە زارداپ شەككەن وتانداستارىمىز تۋرالى ايتتى، دەپ حابارلايدى «ادىرنا» ءتىلشىسى.
ۆەدومستۆو حاتاي پروۆينتسياسىنىڭ انتاكيا قالاسىندا ءۇي قۇلاۋى سالدارىنان قازا تاپقان ءادىل قادىربەكوۆ پەن ميربولات قۇرماشەۆتىڭ دەنەلەرىن وتانعا جەتكىزۋ ءۇشىن بارىنشا كومەك كورسەتىنىن مالىمدەدى. مارقۇمداردىڭ دەنەلەرى 11 اقپاندا انتاليا-الماتى تۇراقتى رەيسىمەن قازاقستانعا جەتكىزىلەدى دەپ كۇتىلۋدە. بارلىق شىعىندى مەملەكەت ءوز موينىنا الادى.
«جەر سىلكىنىسىنەن امان قالعان سابينا مامادياروۆا ادانا قالاسىنىڭ مەملەكەتتىك اۋرۋحاناسىندا ەم الىپ جاتىر. كەشە وعان زاقىمدالعان قولىنا وپەراتسيا جاسالدى، دەنساۋلىق جاعدايى تۇراقتى. ديپلوماتتار ەمدەۋشى دارىگەرلەرمەن تۇراقتى بايلانىستا، قاجەتتى مەديتسينالىق كومەك كورسەتىلۋدە. بۇگىن كونسۋل وعان جەكە بارىپ قايتادى. تۇركياداعى جەر سىلكىنىسى سالدارىنان بولعان قيراۋلار تۋرالى حاباردان بەرى مينيسترلىكتىڭ تاۋلىك بويى جۇمىس ىستەيتىن «جەدەل جەلىسىنە» 1 مىڭنان استام قوڭىراۋلار ءتۇسىپ وڭدەلدى. نەگىزىنەن تۇركيا اۋماعىندا تۋىستارىن تابۋ تۋرالى وتىنىشتەر ءتۇستى.
سونىمەن قاتار تۇركياداعى ديپلوماتتارىمىزعا قوڭىراۋلار مەن وتىنىشتەر ءتۇسىپ جاتىر، ولار وسى بىرنەشە كۇن ىشىندە 150-دەن استام وتانداستىڭ ورنالاسقان جەرىن انىقتاپ، قازاقستانداعى تۋىستارىمەن بايلانىس ورناتۋعا كومەكتەستى»،—دەلىنگەن حابارلامادا.
سوڭعى 4 كۇندە گازيانتەپ، مەرسين، كاحرامانماراش، ديارباكىر، شانلىۋرفا، ادانا، كونيا جانە ەليازىك پروۆينتسيالارىنان 124 قازاقستان ازاماتى شىعارىلدى، ونىڭ ىشىندە 58 قازاقستان ازاماتى استاناعا رەپاترياتسيالىق رەيستەرمەن جەتكىزىلدى.
