تۋعان جەر- اركىمنىڭ كىندىك قانى تامعان قاسيەتتى مەكەن. ناقتى وسى جەر ونى ەلىمەن، وتكەنىمەن جانە بولاشاقپەن بايلانىستىرادى. ءار ادام ءۇشىن ءوزىنىڭ تۋعان جەرىنىڭ كۇنى دە، ءتۇنى دە، تاۋ-تاسى دا، توقتاماي اققان وزەنى مەن جايقالعان گۇلدەرى، ەركەلەي ەسكەن جەلى ، سايراعان قۇستارى ىستىق ءارى قىمبات ەكەنى ءسوزسىز.
مەنىڭ وتانىم-ەگەمەندى قازاقستان. مەن-وسىناۋ توعىز ارىپتەن قۇرالعان الاپات، بايتاق، تاۋەلسىز ەلدىڭ پەرزەنتىمىن. مەن-قانىممەن، جانىممەن، ارىممەن، بارىممەن قازاقپىن. مەن اسقار تاۋلارى كوكپەن تالاسقان، جاسىل جەلەگى جايقالعان، تابيعتى اسەم تاڭعاجايىپ ولكەدە تۋىلعانىمدى ەرەكشە ءبىر سەزىممەن، شەكسىز ىقىلاسپەن ماقتان تۇتامىن. ونىڭ سەبەبى نەدە؟ ەلىمىز-بەيبىت، حالقىمىز-باقىتتى. ەڭ باستىسى، بىز- تاۋەلسىز ەلمىز. قاسىق قاندارى قالعانشا جان بەرىسپەي كۇرەسكەن بابالارىمىزدىڭ بىزگە الىپ بەرگەن ۇلان-بايتاق،تاۋەلسىز جەرىن مەن نەگە سۇيمەيمىن؟ تاۋەلسىزدىگىمىزدى تويلاپ كەلە جاتقانىمىزعا 26 جىلدىڭ ءجۇزى بولىپتى. ەلباسىمىز ن.ءا.نازارباەۆ تاۋەلسىزدىك جايىندا: « تاۋەلسىزدىكتى العاننان گورى، ونى ساقتاپ قالۋ الدەقايدا قيىنىراق»-دەدى. تاۋەلسىزدىكتىڭ وڭاي جولمەن بىزگە كەلمەگەندىگى حاق،الايدا ونى بەرىك ۇستاۋ-ۇلكەن بورىش. 100-دەن اسا وزگە ۇلت وكىلدەرىن قاناتىنىڭ استىنا الىپ، بىرلىگى مەن ىنتىماعى جاراسقان حالقىنا پانا بولعان، ارقاشان ءوز قادىرىن،ءسوز قادىرىن ءتۇسىنىپ دانا بولعان ەلىمدى مەن جان-تانىممەن جاقسى كورەمىن.
تۋعان جەر دەگەندە، ەڭ الدىمەن، جۇرەگىم «قازاقستان» دەپ لۇپىلدەيدى، سودان كەيىن ەلىمىزدىڭ ارايلاعان،اسقاقتاعان استاناسى استانا كوز الدىمىزعا كەلەدى. قازاق حالقىنىڭ بيىك شىڭى، الاش جۇرتشىلىعىنىڭ اسقاق ايبارى-ارۋ استاناعا 20 جىل! ەلباسىمىز ن.ءا. نازارباەۆ ءوزىنىڭ كەزەكتى جولداۋىندا : « 2018 جىل- ەلوردامىز استانانىڭ 20 جىلدىعىن اتاپ وتەتىن مەرەيتويلى جىل. باس قالامىزدىڭ قالىپتاسۋى مەن ەۋرازيانىڭ ماڭىزدى دامۋ ورتالىقتارىنىڭ قاتارىنا قوسىلۋى-بارشامىزدىڭ ورتاق ماقتانىشىمىز»- دەپ وسى جىلدىڭ ەلەۋلى قۋانىشىن اتاپ وتكەن بولاتىن.
20 جىل… الەم تاريحى ساحناسىنداعى 20 جىل! قازاقستان حالقى ءۇشىن قاس-قاعىم ءسات. الايدا، وسى 20 جىل ىشىندەگى بولعان وقيعالاردىڭ بارلىعى ءبىز ءۇشىن وتە قىمبات.استانا ۇشقىر ۋاقىتتىڭ جىلدامدىعىنا كوز ىلەسپەس شاپشاڭدىقپەن وركەندەدى. قازاق حالقىنىڭ ەرەن ەڭبەگىنىڭ ارقاسىندا استانامىز الەم استانالارىمەن تالاي تالاسقا ءتۇسىپ، كوركىمەن، اسەمدىگىمەن الەم حالىقتارىنىڭ نازارىن باۋراپ الدى.
مەنىڭ تۋعان ولكەم- قىزىلوردا. سىر ەلى، جىر ەلىنىڭ وتانى قىزىلوردادا تۋىپ-وسكەنىم ءۇشىن شىن مانىندە باقىتتىمىن. سىر ءوڭىرى -توعىز جولدىڭ تورابىن تۇيىستىرگەن، جاۋگەرشىلىكتە حالقىنا قورعان بولعان قاسيەتتى،كيەلى جەر. ەكولوگيالىق قاۋىپتىڭ قۇرساۋىندا تۇرسا دا، سۇلۋلانىپ، نۇرلانىپ كەلەدى. سىر سۇلۋى قىزىلوردانىڭ شەجىرەسى تولاسسىز جالعاسا بەرمەك.
الماتى. كەيبىرى ءۇشىن وڭتۇستىك قازاقستاننىڭ استاناسى بولار، ال مەن ءۇشىن الماتى- بۇكىل ارماندارىم مەن ماقساتتارىمدى ءبىر ارناعا توعىستىرعان ەرەكشە مەكەن. الماتى مەنىڭ بولاشاعىمنىڭ جارقىلداعان التىن ساۋلەسى ىسپەتتەس. جارقىن بولاشاعىمنىڭ بارلىعى وسى الماتى شاھارىنىڭ توڭىرەگىندە كومكەرىلگەندەي.تالاي تاعدىردى ءبىر ولكەدە ۇشتاستىرعان الماتى مەنىڭ بولاشاعىما اينالعانىن قالايمىن.اپورتتىڭ مەكەنىنە اينالعان الماتىنىڭ مەنىڭ دە مەكەنىمە اينالاتىنىنا سەنىمدىمىن.
تاۋەلسىز مەملەكەت بولۋ-كەشەگى قازاقتىڭ ارمانى..ەلىمىزدىڭ كەمەل بولاشاعىن جاساپ بەرگەن ەلباسىمىز ن.ءا.نازارباەۆتىڭ بەيبىت ماقسات پەن دوستىق قارىم-قاتىناستى دارىپتەيتىن ىزگىلىككە تولى ساياساتىنىڭ ارقاسىندا ۇستاعاننىڭ قولىندا، تىستەگەننىڭ اۋزىندا كەتپەيتىندىگىمىزگە كوز جەتكىزگەندەي كۇي كەشەمىن.
مەنىڭ تۋعان ەلىم، مەنىڭ قازاقستانىم الەم تاريحى ساحناسىندا ماڭگىلىك ەل بولىپ قالاتىنىنا كامىل سەنەمىن.
شالقاروۆا ايدانا ەربولقىزى
قىزىلوردا قالاسىنداعى №145 ورتا مەكتەپتىڭ 11-سىنىپ وقۋشىسى
