جۋرناليست دۋمان مۇحامەتكارىمگە ماجىلىسكە كانديدات بولۋعا رۇقسات بەرىلمەدى. «ادىرنا» ۇلتتىق پورتالى الماتى وبلىسىنىڭ اۋماقتىق سايلاۋ كوميسسياسىنا اقپاراتتىق ساۋال جولداپ، شەشىم سەبەپتەرىن ءتۇسىندىرۋدى سۇرادى.
بۇعان دەيىن باق-تا بەلسەندىنىڭ ءوتىنىشى كونستيتۋتسيانىڭ 51-بابىنىڭ 4-تارماعىنا سايكەس كەلمەۋىنە بايلانىستى قاناعاتتاندىرىلماعانى جازىلعان ەدى. دۋمان مۇحامەتكارىم بۇل اقپاراتتى جوققا شىعاردى.
«ەل اۋماعىنان كەتپەگەنمىن، شەتەلدە تۇرمادىم»،—دەدى ول.
اۋماقتىق سايلاۋ كوميسسياسى پورتالىمىزعا بەرگەن جاۋابىندا ءجۋرناليستىڭ ەل ىشىندە 8 اي ەش جەردە تىركەۋدە تۇرماعانىن مالىمدەدى.
«الماتى وبلىسى پوليتسيا دەپارتامەنتى كوشى-قون قىزمەتى باسقارماسىنىڭ د.مۇحاممەدكارىمگە قاتىستى جاۋابىنا سايكەس قازاقستان رەسپۋبليكاسىنىڭ اۋماعىندا سوڭعى ون جىل تۇرۋى تۇراقتى تىركەۋمەن راستالمايدى. ناقتىراق ايتاتىن بولساق، 2021 جىلدىڭ 21 جەلتوقسانى مەن 2022 جىلعى 19 تامىز ارالىعىندا د.مۇحاممەدكارىم ەل اۋماعىندا تىركەلمەگەن.
وسىعان بايلانىستى وكرۋگتىك سايلاۋ كوميسسياسى كانديدات د.مۇحاممەدكارىم بويىنشا سوڭعى ون جىلدا قازاقستان رەسپۋبليكاسىنىڭ اۋماعىندا تۇراقتى تۇرۋ بولىگىندە كونستيتۋتسيا تالاپتارىنا سايكەستىگى راستالمايتىنى تۋرالى جالعىز ىقتيمال شەشىم قابىلدايدى.
تىركەۋ جوق بولعان كەزىڭدى ازاماتتىڭ قايدا بولعانىن انىقتاۋ دا سايلاۋ كوميسسياسىنىڭ قۇزىرەتىنە جاتپايدى.
سونىمەن قاتار، سايكەسسىزدىكتى انىقتاۋ نەگىزىندە وكرۋگتىك سايلاۋ كوميسسياسى تىركەۋدەن باس تارتۋ تۋرالى بىردەن شەشىم قابىلداعان جوق. كانديداتقا سوڭعى ون جىل ىشىندە قازاقستان اۋماعىندا تۇراقتى تۇرۋىن دالەلدەۋ مۇمكىندىگى ۇسىنىلدى»،—دەپ ءتۇسىندىردى № 12 وكرۋگتىك سايلاۋ كوميسسيانىڭ ءتورايىمى ۇلتۋسىن بارحينوۆا.
سونداي-اق سايلاۋ كوميسسياسى بەلسەندى سوت ارقىلى ەل اۋماعىندا 10 جىل تۇراقتى تۇرعانىن دالەلدەيتىن بولسا، شەشىمدى قايتا قاراۋعا دايىن ەكەنىن اتاپ ءوتتى.
