QR Premer-Mınıstri Álıhan Smaıylov Shymkent qalasyna jumys saparymen keldi. Sapar aıasynda Memleket basshysy tapsyrmasynyń jergilikti jerde oryndalý barysymen tanysyp, birqatar nysandardy aralaý josparlanǵan.
Úkimet basshysy aldymen qaladaǵy zamanaýı saýda-logıstıkalyq ortalyqqa bardy. Qala ákimi M.Áıtenov shaharda ındýstrııalyq aımaqtardy damytý, saýda-logıstıkalyq ortalyqty keńeıtý jumystarynyń barysynan habardar etti.
Búginde Ortalyqtyń qýattylyǵy jylyna 1 mıllıon tonna taýardy qabyldap alýǵa, saqtaýǵa jáne jóneltýge múmkindik beredi. Memleket basshysynyń tapsyrmasyna sáıkes, saýda-logıstıkalyq ortalyqty keńeıtý, oǵan qajetti ınfraqurylym júıelerin tartý júrgizilýde. 2023-2027 jyldary 136 ga aýmaqqa 10 jobany iske asyrý josparlanýda.
Úkimet basshysy Shymkent qalasyndaǵy atalǵan saýda-logıstıkalyq aımaqty keńeıtý arqyly Qazaqstannyń búkil Ońtústik óńirin qamtıtyn Óńirlik hab qurýdyń múmkindigi zor ekenin atap ótti.
- Indýstrııaldy aımaqtardy keńeıtý jańa jobalardy iske asyrýǵa múmkindik beredi. Búginde ónerkásip ónim kólemin arttyrý óte mańyzdy. Saýda-logıstıkalyq ortalyqty keńeıtýge, Shymkent qalasynyń óńirlik habqa aınalýyna barlyq múmkindigi bar. Ol baǵany tómendetip, ishki naryqty taýarlarmen qamtamasyz etý boıynsha ekonomıkaǵa oń áserin tıgizedi. Úkimet tarapynan qandaı kómek kerek bolsa, biz qoldaýǵa daıynbyz, - dedi Á.Smaıylov.
Jalpy, búginde Shymkent qalasynda jańadan 4 óndiristik alań qurý boıynsha belsendi jumys júrgizilýde. Onda jalpy quny 459 mıllıard teńgeni quraıtyn 121 ınvestıııalyq joba iske asyrylady dep josparlanǵan.
