ەلىمىزدە 100-دەن استام سپورت كەشەنى سالىنىپ، بالالارعا ارنالعان سپورت سەكتسيالارى مەن شىعارماشىلىق ۇيىرمەلەرگە 87 ملرد تەڭگە بولىنەدى. پرەمەر-ءمينيستردىڭ ورىنباسارى التاي كولگىنوۆتىڭ قاتىسۋىمەن وتكەن مادەنيەت جانە سپورت مينيسترلىگىنىڭ كەڭەيتىلگەن القا وتىرىسىندا سپورت جانە دەنە شىنىقتىرۋ سالاسىنداعى جۇمىس قورىتىندىلارى مەن اعىمداعى جىلعا ارنالعان جوسپارلار تالقىلاندى. بۇل تۋرالى قر پرەمەر-ءمينيسترىنىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
مادەنيەت جانە سپورت ءمينيسترى اسحات ورالوۆ بيىل سپورتشىلاردى، جاتتىقتىرۋشىلاردى الەۋمەتتىك قولداۋ شارالارىن كورسەتۋ، مۇمكىندىگى شەكتەۋلى سپورتشىلارعا جاعداي جاساۋ جانە ت. ب. بويىنشا جۇمىستار جالعاساتىنىن اتاپ ءوتتى.
«بيىل جاتتىقتىرۋشى-وقىتۋشىلارعا توپتاردى باسقارعانى جانە سپورتشىلاردى جوعارى سپورت ۇيىمدارىنا بەرگەنى ءۇشىن، سونداي-اق سپورتتىق اتاقتارى ءۇشىن ۇستەمەاقىلار مەن قوسىمشا اقىلاردىڭ جاڭا تۇرلەرىن ەنگىزۋدى جوسپارلاپ وتىرمىز», — دەدى اسحات ورالوۆ.
ۆيتسە-پرەمەر التاي كولگىنوۆ سپورتتى دامىتۋ تەك كاسىبي سپورتشىلاردىڭ كورسەتكىشتەرى مەن جەتىستىكتەرى عانا ەمەس، سونىمەن قاتار بۇكىل ۇلتتىڭ ساۋلىعى ەكەنىن اتاپ ءوتتى. سوندىقتان سپورت جانە دەنە شىنىقتىرۋ سالاسىن بارلىق باعىتتاردا دامىتۋ قاجەت.
«مەملەكەت باسشىسى سپورتتى دامىتۋعا، ونىڭ ىشىندە بۇقارالىق سپورتقا، بالالار مەن جاسوسپىرىمدەر مەكتەپتەرى مەن فەدەراتسيالارىن قولداۋعا ەرەكشە نازار اۋدارادى. سپورت نىساندارىندا تاپشىلىق بار ەكەنىن ەسكەرە وتىرىپ، 2025 جىلعا دەيىن 100-دەن استام سپورت كەشەنىن سالۋ قاجەت. بۇل 300 مىڭنان استام ادامدى سپورت ساباقتارىمەن قامتۋعا مۇمكىندىك بەرەدى. سپورت ينفراقۇرىلىمى جوق وڭىرلەردە، ەلدى مەكەندەردە مودۋلدىك سپورت عيماراتتارىن سالۋ كەرەك. مادەنيەت جانە سپورت ءمينيسترلى وڭىرلەرمەن بىرلەسىپ وسى باعىتتاعى جۇمىستى جانداندىرۋى قاجەت، بارلىق نىساندار بەلگىلەنگەن مەرزىمدە تاپسىرىلۋى ءتيىس», — دەدى ۆيتسە-پرەمەر التاي كولگىنوۆ.
پرەمەر-ءمينيستردىڭ ورىنباسارى التاي كولگىنوۆ بيىل بالالارعا ارنالعان سپورت سەكتسيالارى مەن شىعارماشىلىق ۇيىرمەلەرگە 87 ملرد تەڭگەگە جۋىق قاراجات بولىنەتىنىن اتاپ ءوتتى. بۇل 560 مىڭنان استام بالالار مەن جاسوسپىرىمدەردى تەگىن ساباقتارمەن قامتۋعا مۇمكىندىك بەرەدى. (2022 جىلى – 400 مىڭنان استام).
سونىمەن قاتار مادەنيەت جانە سپورت مينيسترلىگىنىڭ الدىندا كاسىپقويلاردىڭ، جاتتىقتىرۋشىلار مەن مامانداردىڭ بىرىڭعاي ەلەكتروندىق دەرەكقورىن ىسكە قوسۋ مىندەتى تۇر. بازا سپورتشىنىڭ فيزيكالىق جانە مورالدىق جاعدايىن، ونىڭ كۇشتى جانە ءالسىز جاقتارىن وبەكتيۆتى باعالاۋعا مۇمكىندىك بەرەدى. سونداي-اق تالانتتاردى ىزدەۋ جانە دامىتۋ جونىندەگى جۇمىستى جۇيەلەۋگە جانە سپورتشىلار مەن جاتتىقتىرۋشىلاردى باعالاۋ كەزىندە سۋبەكتيۆتىلىكتى بولدىرماۋعا مۇمكىندىك بەرەدى.
سونداي-اق، القا وتىرىسى بارىسىندا 2023 جىل – وليمپياداعا دەيىنگى جىل ەكەندىگى اتاپ ءوتىلدى. مادەنيەت جانە سپورت منيسترلىگىنىڭ ۇلتتىق وليمپيادالىق كوميتەتىمەن جانە فەدەراتسيالارمەن بىرلەسىپ، الداعى پاريج-2024 جازعى وليمپيادا ويىندارىنا ساپالى دايىندىقتى قامتاماسىز ەتۋى ماڭىزدى. فەدەراتسيا جۇمىسىنىڭ نەگىزگى كورسەتكىشتەرى وليمپيادا ويىندارى مەن الەم چەمپيوناتتارىنداعى ناتيجەلەر بولادى.
"ادىرنا" ۇلتتىق پورتالى
