استاناداعى «نۇر-الەم» پاۆيلونىندا قر پرەزيدەنتى نۇرسۇلتان نازارباەۆتىڭ قاتىسۋىمەن جاستار جىلىنىڭ سالتاناتتى اشىلۋ ءراسىمى ءوتىپ، ونى مەملەكەتتىك ارنالار تىكەلەي ەفيردە كورسەتتى.
«تاۋەلسىزدىكتىڭ ۇرپاقتارى» اتاۋىمەن وتكەن بۇل شاراعا ۇكىمەت مۇشەلەرى، پارلامەنت دەپۋتاتتارى، جەرگىلىكتى اتقارۋشى ورگانداردىڭ باسشىلارى، قر پرەزيدەنتىنىڭ جانىنداعى جاستار ساياساتى كەڭەسىنىڭ مۇشەلەرى، «100 جاڭا ەسىم» بايقاۋىنىڭ جەڭىمپازدارى، «بولاشاق» باعدارلاماسىنىڭ تۇلەكتەرى سىندى دارىندار قاتىستى.
وسىلايشا قازاق جاستارىنىڭ قايماقتارى مەن شەندى-شەكپەندىلەرى جينالعان جيىندا ءار سالادا جەتىستىكتەرگە جەتكەن 13 سپيكەر بايانداما جاسادى.
باياندامالاردى مۇقيات تىڭداعان ەلباسى جاستاردى ەلىمىزدىڭ باسەكەگە قابىلەتتى باستى فاكتورى دەپ باعالاپ، ەل دامۋىنىڭ ءارى قارايعى تىزگىنى ءوز قولدارىندا ەكەندىگىن ايتتى.
ءبىزدى ەل ەرتەڭى سانالاتىن جاستاردىڭ بولاشاعى قاي تىلمەن بايلانىستىراتىنى قىزىقتىردى.
ويتكەنى، ازاتتىقتىڭ اق تاڭى اتقاندا مەملەكەتتىڭ نەگىزىن قۇرۋشى (قۇراۋشى ەمەس!) ۇلتتىڭ ازشىلىقتا بولعانى راس. ۋاقىت وتكەن سايىن قازاقتاردىڭ سانى ارتىپ، كەم دەگەندە 70 پايىزدان اسىپ وتىر. ەندىگىدە مەملەكەتتىك بيلىككە تاۋەلسىزدىكتىڭ ار جاق، بەر جاعىنداعى جاستار كەلەتىنىن ەسكەرسەك، مىنبەردەن سويلەيتىن سوزدەردىڭ قاي تىلگە قاراي باعىت الاتىنىن اڭعارۋ قيىن ەمەس.
سونىمەن مىنبەردەن بايانداما جاساعان 13 جاستىڭ 5-ەۋى عانا تازا قازاق تىلىندە سويلەدى (مەرەي قارت، ابزال مىرزاش، ايشولپان نۇرعايىپ، جازيرا تۇرعىنوۆا، مەيىربەك مەڭدىعاليەۆ).
بۇل – ەلىمىزگە تاراپ جاتقان تىكەلەي ەفيردىڭ 38 پايىزى عانا قازاق تىلىندە كورسەتىلدى دەگەندى بىلدىرەدى. تاۋەلسىزدىكتىڭ العاشقى جىلدارى بولسا ءبىر ءجون دەر ەدىك. ەگەمەن ەل بولعالى 28-ءشى جىلعا جاقىنداعان ۋاقىتتا مۇنداي كورسەتكىش – سىپايىلاپ ايتقاندا وتە ۇياتتى جاعداي.
بايانداما جاساعان وزگە ۇلت وكىلدەرىنە قۇرمەتىمىز ەرەكشە. اماندىق ءسوزىن ايتىپ، ءتىلىمىزدىڭ مارتەبەسىن وسىرگەنىنە العىس ايتامىز.
ال، ءوز قاراكوزدەرىمىزگە نە جورىق؟ قانداستارىمىزدىڭ انا ءتىلى مەن ورىس تىلىندە وقىعان ديكتسياسىنا قاراپ، تاڭدانباسقا شارا قالمادى. مۇنى – ءبىر دەيىك. جاستارىمىز قازىرگى جۇيەدەگى تەندەنتسيانى شەبەر مەڭگەرىپتى. ياعني، كوپشىلىكتى الدارقاتۋ ءۇشىن قازاق تىلىندە امانداسىپ الادى دا، شارۋاشىلىق جايىن وزىنە ىڭعايلى ورىسشامەن سۋدىراتادى. سويتە تۇرا «مەن ەلىمنىڭ پاتريوتىمىن» دەگەندى نىعىرلاپ تۇرىپ قوسىپ قويادى.
قازاق «نە ەكسەڭ، سونى وراسىڭ» دەيدى. قازاق ءتىلى دەپ قاقساپ جۇرگەندەردىڭ ءمانىسى وسى ماتەلدە جاتىر. ەلىمىزدەگى ەڭ بيىك مىنبەرلەردەن ايتىلاتىن سوزدەردىڭ ىشىندەگى باستىلارى – بيزنەس، ەكونوميكا، ساياسات، عىلىم تىلدەرى ورىس تىلىندە ايتىلادى. ەستي-ەستي قۇلاعىمىزدى جاۋىر قىلعان رۋحاني قۇندىلىقتارىمىز عانا انا تىلىمىزدە ايتىلادى.
تەك الماتى قبتۋ 2-كۋرس ستۋدەنتى 13 جاسار ابزال مىرزاشتىڭ جوباسى قازاق ءتىلىنىڭ كەڭ قانات جايۋىنا ۇلكەن سەپتىگى تيەتىنىن ەستىپ، توبەمىز كوككە جەتكەندەي قۋاندىق.
سوندا دەيمىز-اۋ، «ماڭگىلىك ەلگە» بەت العان ەلىمىزدىڭ قاراكوز جاستارىنىڭ ورىس ءتىلىنسىز كۇنى قاراڭ بولعانى ما؟ الدە، جوعارى لاۋازىمعا يە بولۋدىڭ توتە جولى ما؟ ءسىز قالاي ويلايسىز، قۇرمەتتى وقىرمان؟
جاسۇلان ءناۋرىزالى
«ادىرنا» ۇلتتىق پورتالى
