Astanadaǵy «Nur-álem» pavılonynda QR Prezıdenti Nursultan Nazarbaevtyń qatysýymen jastar jylynyń saltanatty ashylý rásimi ótip, ony memlekettik arnalar tikeleı efırde kórsetti.
«Táýelsizdiktiń urpaqtary» ataýymen ótken bul sharaǵa Úkimet músheleri, Parlament depýtattary, jergilikti atqarýshy organdardyń basshylary, QR Prezıdentiniń janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri syndy daryndar qatysty.
Osylaısha qazaq jastarynyń qaımaqtary men shendi-shekpendileri jınalǵan jıynda ár salada jetistikterge jetken 13 spıker baıandama jasady.
Baıandamalardy muqııat tyńdaǵan Elbasy jastardy elimizdiń básekege qabiletti basty faktory dep baǵalap, el damýynyń ári qaraıǵy tizgini óz qoldarynda ekendigin aıtty.
Bizdi el erteńi sanalatyn jastardyń bolashaǵy qaı tilmen baılanystyratyny qyzyqtyrdy.
Óıtkeni, azattyqtyń aq tańy atqanda memlekettiń negizin qurýshy (quraýshy emes!) ulttyń azshylyqta bolǵany ras. Ýaqyt ótken saıyn qazaqtardyń sany artyp, kem degende 70 paıyzdan asyp otyr. Endigide memlekettik bılikke táýelsizdiktiń ar jaq, ber jaǵyndaǵy jastar keletinin eskersek, minberden sóıleıtin sózderdiń qaı tilge qaraı baǵyt alatynyn ańǵarý qıyn emes.
Sonymen minberden baıandama jasaǵan 13 jastyń 5-eýi ǵana taza qazaq tilinde sóıledi (Mereı Qart, Abzal Myrzash, Aısholpan Nurǵaıyp, Jazıra Turǵynova, Meıirbek Meńdiǵalıev).
Bul – elimizge tarap jatqan tikeleı efırdiń 38 paıyzy ǵana qazaq tilinde kórsetildi degendi bildiredi. Táýelsizdiktiń alǵashqy jyldary bolsa bir jón der edik. Egemen el bolǵaly 28-shi jylǵa jaqyndaǵan ýaqytta mundaı kórsetkish – sypaıylap aıtqanda óte uıatty jaǵdaı.
Baıandama jasaǵan ózge ult ókilderine qurmetimiz erekshe. Amandyq sózin aıtyp, tilimizdiń mártebesin ósirgenine alǵys aıtamyz.
Al, óz qarakózderimizge ne joryq? Qandastarymyzdyń ana tili men orys tilinde oqyǵan dıkııasyna qarap, tańdanbasqa shara qalmady. Muny – bir deıik. Jastarymyz qazirgi júıedegi tendenııany sheber meńgeripti. Iaǵnı, kópshilikti aldarqatý úshin qazaq tilinde amandasyp alady da, sharýashylyq jaıyn ózine yńǵaıly orysshamen sýdyratady. Sóıte tura «men elimniń patrıotymyn» degendi nyǵyrlap turyp qosyp qoıady.
Qazaq «ne ekseń, sony orasyń» deıdi. Qazaq tili dep qaqsap júrgenderdiń mánisi osy mátelde jatyr. Elimizdegi eń bıik minberlerden aıtylatyn sózderdiń ishindegi bastylary – bıznes, ekonomıka, saıasat, ǵylym tilderi orys tilinde aıtylady. Estı-estı qulaǵymyzdy jaýyr qylǵan rýhanı qundylyqtarymyz ǵana ana tilimizde aıtylady.
Tek Almaty QBTÝ 2-kýrs stýdenti 13 jasar Abzal Myrzashtyń jobasy qazaq tiliniń keń qanat jaıýyna úlken septigi tıetinin estip, tóbemiz kókke jetkendeı qýandyq.
Sonda deımiz-aý, «Máńgilik elge» bet alǵan elimizdiń qarakóz jastarynyń orys tilinsiz kúni qarań bolǵany ma? Álde, joǵary laýazymǵa ıe bolýdyń tóte joly ma? Siz qalaı oılaısyz, qurmetti oqyrman?
Jasulan Naýryzáli
«Adyrna» ulttyq portaly
