"سۋبسيديا جىرى ءبىر جىلعا سوزىلدى. حالىقتىڭ بيلىككە دەگەن سەنىمى وتە تومەن. ساعاتتاپ وتەتىن باسقوسۋلاردا ءار ۇسىنىستىڭ ەكونوميكالىق، قۇقىقتىق تەڭدىگىن سالىستىرۋدىڭ ورنىنا بوس ۋاقىت جوعالتىپ، ءبىر-بىرىمىزگە نوتاتسيا وقىپ وتىرامىز". بۇل پىكىردى «اتامەكەن» ۇكپ تورالقاسى اگروونەركاسىپتىك كەشەن كوميتەتىنىڭ توراعاسى جيگۋلي دايراباەۆ ايتتى، دەپ جازادى "ادىرنا" ۇلتتىق پورتالى.
"بۇگىنگى جاعداي حالىقتىڭ بيلىككە دەگەن سەنىمىنىڭ وتە تومەن دەڭگەيدە ەكەنىن كورسەتىپ وتىر. ال فەرمەرلەر بولسا، اۋىل شارۋاشىلىعى مينيسترلىگىنە ءتىپتى سەنۋدى قويدى. نەگە؟ ماسەلەن، مينيسترلىك اپپاراتىنا قارايىقشى، كىم وتىر وندا؟ ءوندىرىستى تۇسىنەتىن، دالا مەن قالانىڭ ايىرماشىلىعىن بىلەتىندەر قانشا؟ راسىن ايتايىن، ساۋساقپەن سانارلىق. ماماندار فەرمەرلەرمەن ءبىر تىلدە سويلەسپەسە، قانداي ماسەلەنى شەشۋگە بولادى؟! پرەزيدەنتىمىز ءوز جولداۋىندا: "مينيسترلىكتەر كوپ" دەگەن سۇراقتار بويىنشا دەربەستىك الىپ، دارا شەشىم قابىلداۋعا مۇمكىندىك الامىن دەگەن ەدى. سول پرينتسيپ قاشان ەنگىزىلەدى؟ ۆيتسە-مينيستر لازاۋىمىنا كەلەتىن ادامدى ۇكىمەتپەن كەلىستىرۋدى توقتاتۋ كەرەك! ۆيتسە-مينيستر بولسىن، دەپارتامەنت ديرەكتورى بولسىن، ولاردىڭ كانديداتۋراسى قوعامدىق ۇيىمداردىڭ كەلىسىمىمەن بەكىتىلۋى كەرەك! سوندا عانا فەرمەرلەر سەنىم ارتادى. ەربول شىراقبايۇلىنا ءوز باسىم كامىل سەنەمىن. الايدا مينيسترلىكتەگى مامانداردىڭ ارتىستىگىنەن تاياقتىڭ ۇشى سوعان دا ءتيىپ جاتىر", - دەيدى جيگۋلي دايراباەۆ.
ەكىنشى ماسەلە باتىلدىق جايلى.
"سەرىك ماقاشۇلى! بايقايسىز با؟ مينيسترلىكتەردىڭ بارلىعى قوعامدىق رەزونانستان قورقاتىن ادەت شىعاردى. تيت ەتسە ۇركەتىن بولدى. سونىڭ سالدارىنان سالامىزعا ناقتى قاجەت دەگەن كوپتەگەن زاڭ جوبالارى كەرى قايتارىلدى. مىسالى، قوسالقى شارۋاشىلىق تۋرالى زاڭ. وسىندايدىڭ كەسىرىنەن قابىلدانبادى. بلوگەرلەر مەن ءار ءتۇرلى ديۆان ەكسپەرتتەرىنىڭ كەسىرىنەن سۋبسيديا جىرى ءبىر جىلعا سوزىلدى. سەنەسىز بە؟ 1 جىل. مينيسترلىك قىزمەتكەرلەرىندە جۇمىسشى توپتار نە ايتسا، سوعان عانا اۋاتىن ۇدەرىس پايدا بولدى. بۇل نە سۇمدىق؟ سوندا اتامەكەن پالاتاسىنىڭ ءاربىر ونەركاسىپتىك كەشەن كوميتەتى قايدا؟ مينيسترلىكتىڭ جانىنان قۇرىلعان قوعامدىق كەڭەس قايدا؟ جوق، ولارعا سەنىم جوق پا؟ سەنىمنىڭ بولماعانى ما، قالاي؟ سۋبسيتسيا ماسەلەسىندە ەربول شىراقبايۇلى ۇسىنعان رەفورمالار اۋاداي قاجەت! ەكونوميكالىق تۇرعىدان ابدەن ءپىسىپ، جەتىلگەن، سانمەن دالەلدەنگەن ۇسىنىستار. بىراق، ورىنسىز شۋ كوبەيتىپ كەتتى دە، اقىر اياعى باياعى قالپىنا قايتا ورالدى. جينالىستاردا رەفورمالاردىڭ ەكونوميكالىق تۇسى ءتىپتى ايتىلمايتىن جاعدايعا جەتتىك. ساعاتتاپ وتەتىن باسقوسۋلاردا ءار ۇسىنىستىڭ ەكونوميكالىق، قۇقىقتىق تەڭدىگىن سالىستىرۋدىڭ ورنىنا بوس ۋاقىت جوعالتىپ، ءبىر-بىرىمىزگە نوتاتسيا وقىپ وتىرامىز. ايتپاعىم، مينيسترلىكتەرگە دەربەستىك پەن قوسا باتىلدىق كەرەك. وسىنى قاپەرىڭىزگە الساڭىز، قۇرمەتتى سەرىك ماقاشۇلى!",- دەدى دايراباەۆ.
"ادىرنا" ۇلتتىق پورتالى
