تۇركىستان وبلىسىندا كومىردىڭ جوقتىعىنان جىلىجايلاردى جىلىتۋ مۇمكىن بولماي، ونداعى كوشەتتەر مەن ونىمدەر ءۇسىپ جاتىر، دەپ حابارلايدى “ادىرنا” ءتىلشىسى قازاقپاراتقا سىلتەپ.
اقپارات بويىنشا، تۇركىستان وبلىسىندا جىلىجاي يەلەرى ءپىسىپ ۇلگەرمەگەن ءونىمىن قوقىسقا تاستاۋعا ءماجبۇر. سەبەبى شارۋالار كۇن سۋىعاندا كومىردىڭ جوقتىعىنان جىلىجايلارىن جىلىتا الماعان.
سايرام اۋدانىنداعى «نۇراگرو» شارۋا قوجالىعىندا 150 توننا قىزاناق جارامسىز بولىپ قالعان. يەسى نۇرجان سادۋاقاسوۆ قۇزىرلى ورگانداردان ارنايى كوميسسيانىڭ كەلۋىن كۇتىپ وتىر. سودان سوڭ بۇلىنگەن ەگىندى جيناپ، مالعا بەرمەك.
بۇل جاعدايعا قاتىستى تۇسىنىك بەرگەن تۇركىستان وبلىسى اكىمدىگىنىڭ ءباسپاسوز قىزمەتى جىلىجاي يەلەرىنە قولداۋ كورسەتىلەتىنىن جەتكىزدى.
بيىل قاڭتار ايىندا اۋا رايى -22 گرادۋسقا دەيىن كۇرت سۋىپ، قار قالىڭ ءتۇستى. جەكە جىلىجاي شارۋاشىلىقتارى ءتيىستى كومىر قورىن قالىپتاستىرماعاندىقتان قىس مەزگىلىنە دايىن بولماي شىقتى. وبلىس اكىمىنىڭ تاپسىرماسىنا سايكەس شۇعىل ءىس-شارالار اتقارىلىپ، 591,0 گەكتار (1058 اگروقۇرىلىم) جىلىجايلارعا قىستا 200,8 مىڭ توننا كومىر وتىنى قاجەتتىگى انىقتالدى. «قازاقستان تەمىر جولى» اق ارقىلى 186,7 مىڭ توننا كومىر وبلىسقا جەتكىزىلدى - دەلىنگەن اقپاراتتا.
اكىمدىك مالىمەتىنە سۇيەنسەك، جىلىجايلاردىڭ 94%-ى قولدان جاسالعان جەڭىل كونسترۋكتسيالى بولعاندىقتان، ونىمدەرى ءۇسىپ كەتكەن. ونىڭ ىشىندە 167 تاۋار ءوندىرۋشىنىڭ 36 گەكتار جىلىجايى قار سالماعىن كوتەرە الماي، جارامسىز كۇيگە تۇسكەن. وسىلايشا، جەكە كاسىپكەرلەر شىعىنعا ۇشىرادى.
«اكىمدىك تاراپىنان تاۋار وندىرۋشىلەردىڭ مۇلكىنە كەلتىرىلگەن نۇقسان جونىندە اكت ۇسىنىلعان جاعدايدا قارجى ۇيىمدارى الدىنداعى بەرەشەگىن (نەسيە) وتەۋ مەرزىمىن 1 جىلعا كەيىنگە شەگەرۋ جونىندە ۇسىنىس جولدانادى. سونداي-اق زارداپ شەككەن جىلىجاي يەلەرىن قارجى ۇيىمدارى ارقىلى جەڭىلدەتىلگەن نەسيەمەن قامتاماسىز ەتۋ جۇمىستارى اتقارىلادى»، - دەلىنگەن تۇركىستان وبلىسى اكىمدىگىنىڭ ءباسپاسوز قىزمەتى تاراتقان مالىمەتتە.
