Túrkistan oblysynda jylyjaıdaǵy ónimder úsip jatyr

2108
Adyrna.kz Telegram
Foto: inform.kz
Foto: inform.kz

Túrkistan oblysynda kómirdiń joqtyǵynan jylyjaılardy jylytý múmkin bolmaı, ondaǵy kóshetter men ónimder úsip jatyr, dep habarlaıdy “Adyrna” tilshisi QazAqparatqa siltep.

Aqparat boıynsha, Túrkistan oblysynda jylyjaı ıeleri pisip úlgermegen ónimin qoqysqa tastaýǵa májbúr. Sebebi sharýalar kún sýyǵanda kómirdiń joqtyǵynan jylyjaılaryn jylyta almaǵan.

Saıram aýdanyndaǵy «NurAgro» sharýa qojalyǵynda 150 tonna qyzanaq jaramsyz bolyp qalǵan. Iesi Nurjan Sadýaqasov quzyrly organdardan arnaıy komıssııanyń kelýin kútip otyr. Sodan soń búlingen egindi jınap, malǵa bermek.

Bul jaǵdaıǵa qatysty túsinik bergen Túrkistan oblysy ákimdiginiń baspasóz qyzmeti jylyjaı ıelerine qoldaý kórsetiletinin jetkizdi.

Bıyl qańtar aıynda aýa raıy -22 gradýsqa deıin kúrt sýyp, qar qalyń tústi. Jeke jylyjaı sharýashylyqtary tıisti kómir qoryn qalyptastyrmaǵandyqtan qys mezgiline daıyn bolmaı shyqty. Oblys ákiminiń tapsyrmasyna sáıkes shuǵyl is-sharalar atqarylyp, 591,0 gektar (1058 agroqurylym) jylyjaılarǵa qysta 200,8 myń tonna kómir otyny qajettigi anyqtaldy. «Qazaqstan temir joly» AQ arqyly 186,7 myń tonna kómir oblysqa jetkizildi - delingen aqparatta.

Ákimdik málimetine súıensek, jylyjaılardyń 94%-y qoldan jasalǵan jeńil konstrýkııaly bolǵandyqtan, ónimderi úsip ketken. Onyń ishinde 167 taýar óndirýshiniń 36 gektar jylyjaıy qar salmaǵyn kótere almaı, jaramsyz kúıge túsken. Osylaısha, jeke kásipkerler shyǵynǵa ushyrady.

«Ákimdik tarapynan taýar óndirýshilerdiń múlkine keltirilgen nuqsan jóninde akt usynylǵan jaǵdaıda qarjy uıymdary aldyndaǵy bereshegin (nesıe) óteý merzimin 1 jylǵa keıinge shegerý jóninde usynys joldanady. Sondaı-aq zardap shekken jylyjaı ıelerin qarjy uıymdary arqyly jeńildetilgen nesıemen qamtamasyz etý jumystary atqarylady», - delingen Túrkistan oblysy ákimdiginiń baspasóz qyzmeti taratqan málimette.

Pikirler