الماتىدا دەنە شىنىقتىرۋ ساباعىندا وقىس سوققىدا جابىق باس مي جاراقاتىن الىپ، اۋرۋحاناعا تۇسكەن توعىز جاستاعى بالاعا قاتىستى وقيعا تەرگەلىپ جاتىر، دەپ حابارلايدى “ادىرنا” ۇلتتىق پورتالى.
ءىىم ءباسپاسوز قىزمەتى قازىر بۇل فاكتى بويىنشا الماتى قالاسى مەدەۋ اۋدانىنىڭ پوليتسيا ءبولىمى تەرگەۋ جۇرگىزىپ جاتقانىن مالىمدەدى. بالانىڭ العان جاراقاتىنىڭ اۋىرلىعىن انىقتاۋ ءۇشىن سوت-مەديتسينالىق ساراپتاما تاعايىندالعان.
ال وقۋشىنىڭ اناسى وقيعانى جاسىرۋعا تىرىسقان مەكتەپ اكىمشىلىگىنە نارازى.
توعىز جاستاعى بالانىڭ اناسى 14 جەلتوقساندا No48 مەكتەپ-ليتسەيدە دەنە شىنىقتىرۋ ساباعىندا وقىس وقيعا ورىن العانىن، كەيىن بالا جابىق باس-مي جانە بىرقاتار بەتىندەگى، كوز الماسىنىڭ كونتۋزياسى جانە كوگەرگەن جەرلەر جاراقاتتارمەن اۋرۋحاناعا تۇسكەنىن ايتتى.
"ۆيدەولاردىڭ بىرىندە دەنە شىنىقتىرۋ ءپانىنىڭ مۇعالىمى بالانى جاتتىعۋ زالىنان قالاي كوتەرىپ الىپ بارا جاتقانى كورسەتىلگەن. بۇعان قاراپ سوقتىعىسقاننان كەيىن بالانىڭ قانداي كۇيدە بولعانىن كورۋگە بولادى. وعان ءتىپتى قاجەتتى مەديتسينالىق كومەك كورسەتىلمەگەن، جەدەل جاردەم شاقىرىلماعان. ولار وقيعانى بارىنشا جاسىرۋعا تىرىسقان. وقيعادان كەيىن بىردەن مۇعالىم قوڭىراۋ شالىپ، بولعان وقيعانى جەڭىل تۇردە ايتىپ، جەدەل جاردەم شاقىرايىق پا دەپ سۇرادى. جاعدايدى جەڭىل سيپاتتاعاسىن مەن وندا اسا قاتتى دانەڭە جوق شىعار دەپ، قاجەت ەمەس ەكەنىن ايتتىم. ءتىپتى ەسىك الدىنا شىعىپ تۇرسىن، الىپ كەتەمىن دەپ ءوتىندىم”،- دەيدى بالانىڭ اناسى كتك ارناسىنا.
اناسى بالاسىن ءوز كوزىمەن كورگەندە ءبارى سۋرەتتەلگەننەن الدەقايدا اۋىر ەكەنىن تۇسىنگەن.
“مۇرنىنان قويۋ قان شىعىپ، اياعىن ارەڭ باسىپ تۇردى. بەتى بوزارىپ، دىرىلدەپ، اۋىرعاننان جىلادى. مۇعالىم ونى كيىندىرىپ، ەكىنشى قاباتتاعى كابينەتىنىڭ ەسىگىنەن شىعارىپ سالىپ، تەزىرەك ساۋىعىپ كەتۋىن تىلەدى. ەسىك جابىلعان سوڭ ولاردان ەسەپ سۇرايتىن ۋاقىت بولمادى. مەن بالانى مەكتەپتەن قولىما كوتەرىپ الىپ شىقتىم دا وز بەتىمشە اۋرۋحاناعا اپارۋدى شەشتىم", - دەپ قوستى ول.
بالانىڭ اناسىنىڭ سوزىنشە، بەينەباقىلاۋ كامەرالارىنىڭ جازبالارىنا قاراعاندا، دەنە شىنىقتىرۋ ساباعىندا قاۋىپسىزدىك شارالارى ساقتالماعان. مۇعالىم وقۋشىلارعا ءتيىستى كوڭىل بولمەگەن. اتا-انالار ديرەكتور مەن مۇعالىمگە شارا قولدانۋدى تالاپ ەتەدى.
پوليتسيا بۇل ءىس بويىنشا كەشەنگە جۇرگىزىلگەن تەكسەرۋ شارالارى ناتيجەلەرى بويىنشا شەشىم قابىلدانادى دەپ جاۋاپ بەردى.
