16 qańtar kúni Almaty qalasy Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda aqyn, Qazaqstan Jazýshylar odaǵy tóraǵasynyń orynbasary Baqyt Bedelhannyń “9 gramm” ıntellektýaldy poetıkalyq dramasynyń tusaýkeseri ótti.
Týyndynyń rejısseri Juldyzbek Jumataı jáne dybyspen kórkemdegen sazger Qanat Ibragımov.
Poetıkalyq dramany Qarasaı aýdanynyń “Qarasaı jastary” teatry sahnalap, óner súıer qaýymnyń ystyq yqylasyna bólendi. Táýelsizdigimizdiń tarıhyna deıin “9 gramm” oqqa baılanǵan «Alash» arystarynyń rýhyna arnalǵan bul qoıylym, tyń týyndy retinde kórermen kóńilinen shyqty. Premerada Qazaqstannyń eńbek eri, Qazaqstan teatrlar assoıaııasynyń prezıdenti, kıno jáne teatr akteri, professor Asanáli Áshimov “Qarasaı jastary” teatryna sáttilik tilep, aq batasyn berdi.
Kesh sońynda «Qarasaı aýdanynyń ishki saıasat, mádenıet, tilderdi damytý jáne sport bóliminiń» basshysy Kúljan Ádilhanqyzy Dúısenova, Ǵ.Músirepov atyndaǵy Qazaq memlekettik akademııalyq balalar men jasóspirimder teatry ujymyna jáne basshysyna «Qarasaı Jastary» teatrynyń Respýblıkalyq deńgeıde óner kórsetip shyǵarmashylyq damýyna uıytqy bolǵany úshin aýdan ákiminiń alǵysyn jetkizdi.
Sondaı-aq jas urpaqty qasıetti ónerge baýlyp, ıgi dástúrlerdi jalǵastyryp «Qarasaı Jastary» teatryna qoldaý kórsetip júrgen aqyn Baqyt Bedelhanǵa jáne qoıylym kompozıtory Qanat Ibragımovqa kórermen aldynda aýdan ákimi Jasulan Toqqojauly Estenovtiń alǵys haty tapsyryldy. Teatr zaly kórermenge lyq tolyp, qoıylym joǵary deńgeıde ótti.
