اقتوبە وبلىسى پرەزيدەنتتىڭ سايلاۋالدى باعدارلاماسىنداعى اۋىل تۇرعىندارىنىڭ تابىسىن ارتتىرۋ جونىندەگى باستامالارىن جۇزەگە اسىرۋعا العاشقىلاردىڭ ءبىرى بولىپ كىرىستى. بۇل جۇمىسقا «AMANAT» پارتياسى بەلسەندى اتسالىسۋدا. بۇگىن پارتيا توراعاسى ەرلان قوشانوۆ وڭىردەگى شارۋا قوجالىقتارىنىڭ وكىلدەرىمەن كەزدەسىپ، «اۋىل اماناتى» جوباسىنىڭ جاڭا كەزەڭىن جۇزەگە اسىرۋدى تالقىلادى جانە «قارجىلىق ساۋاتتىلىقتى ارتتىرۋ» جاڭا پارتيالىق جوباسىن ىسكە قوستى.
اقتوبە قالاسىندا اۋىل شارۋاشىلىعى ءمينيسترى ەربول قاراشوكەەۆتىڭ، وبلىس اكىمى ەرالى توعجانوۆتىڭ جانە مەملەكەتتىك ورگاندار وكىلدەرىنىڭ، وڭىردەگى اۋىل شارۋاشىلىعى تاۋارىن وندىرۋشىلەردىڭ قاتىسۋىمەن «اۋىل اماناتى» جوباسىن ىسكە اسىرۋ ماسەلەلەرى بويىنشا كەڭەس ءوتتى. وعان بارلىعى 200-دەن استام ادام قاتىستى.
پارتيا توراعاسى ەرلان قوشانوۆ پرەزيدەنت قاسىم-جومارت توقاەۆ ءوزىنىڭ سايلاۋالدى باعدارلاماسىندا اۋىل ماسەلەسىن ءبىرىنشى كەزەككە قويىپ وتىرعانىن اتاپ ءوتتى. جالپى، الداعى 7 جىلدا اۋىل تۇرعىندارىنىڭ تابىسىن ارتتىرۋعا 1 تريلليون تەڭگە ءبولۋ جوسپارلانىپ وتىر. سونىڭ ناتيجەسىندە اۋىل شارۋاشىلىعىندا 350 مىڭنان استام جۇمىس ورىنى اشىلادى دەپ كۇتىلۋدە.
«اۋىل حالقىنىڭ تۇرمىسىن جاقسارتىپ، تابىسىن ارتتىرۋ، بارلىق الەۋمەتتىك ماسەلەلەردى شۇعىل شەشۋ ءۇشىن ۇكىمەت «AMANAT» پارتياسىمەن بىرلەسىپ «اۋىل اماناتى» جوباسىن ىسكە اسىرۋدا. بيىلدىڭ وزىندە ونى جۇزەگە اسىرۋعا 52 ميلليارد تەڭگە ءبولىندى. پارتيا جانىنان ادىسنامالىق سۇيەمەلدەۋدى، ازاماتتار مەن اكىمدەردى وقىتۋدى، وتىنىمدەردى قابىلداۋ جانە قاراجاتتى ءبولۋ پروتسەسىنىڭ مونيتورينگىن قامتاماسىز ەتەتىن جوبالىق كەڭسە اشىلدى. بۇل – اۋىلداردى كوتەرۋگە مۇمكىندىك بەرەتىن ناقتى قادام»، - دەدى ەرلان قوشانوۆ.
ول جوبانىڭ پيلوتتىق ۇلگىسى جامبىل وبلىسىندا جەمىستى جۇزەگە اسىرىلعانىن، ناتيجەسىندە 11 اۋىلدىق وكرۋگتە ورتاشا ايلىق تابىس 1,7 ەسە وسكەنىن، اتاۋلى الەۋمەتتىك كومەك الۋشىلار سانى 3 ەسەگە ازايعانىن، جۇمىسسىزدار سانى 36% تومەندەگەنىن اتاپ ءوتتى. «AMANAT» پارتياسى مەن ۇكىمەتتىڭ مىندەتى – «اۋىل اماناتى» جوباسىن بارلىق وڭىرگە ەنگىزۋ. جوبانىڭ بارلىق ارتىقشىلىعى تۋرالى حالىقتى دۇرىس حاباردار ەتۋ دە ماڭىزدى.
«اۋىل اماناتى» جوباسى اياسىندا نەسيە الۋدىڭ ىڭعايلى ءارى جىلدام بولۋىنا ەرەكشە نازار اۋدارىلادى. ءوتىنىم ەتسق ارقىلى ارنايى تسيفرلىق پلاتفورمادا ونلاين بەرىلەدى. سونىمەن قاتار، ەگەر بۇرىن نەسيەنى ماقۇلداۋ ءۇش اپتاعا سوزىلسا، قازىر ول ەڭ كوپ دەگەندە ءۇش ساعاتقا سوزىلۋى كەرەك. قاجەتتى مالىمەتتەر بارلىق قول جەتىمدى دەرەكقورلاردان اۆتوماتتى تۇردە جينالادى. قازىرگى ۋاقىتتا تسيفرلىق پلاتفورما پيلوتتىق رەجيمدە جۇمىس ىستەيدى.
وسى كۇنى ەرلان قوشانوۆ مارتوك اۋدانىنىڭ تۇرعىندارىمەن، «اۋىل اماناتى» جوباسىنىڭ قاتىسۋشىلارىمەن كەزدەسىپ، جوبانىڭ نەگىزگى باعىتتارى تۋرالى ايتىپ، تۇرعىنداردىڭ سۇراقتارىنا جاۋاپ بەردى. پارتيا توراعاسىنىڭ قاتىسۋىمەن العاشقى قارىز رەسىمدەلدى – شارۋا قوجالىقتارىنىڭ ءبىرىنىڭ باسشىسى تاڭىربەرگەن اۋىلىنىڭ تۇرعىنىنا 4 ملن تەڭگەگە تاۋارلىق نەسيە بەردى.
سونداي-اق، مارتوك اۋدانىندا اۋىل تۇرعىندارىنىڭ قارجىلىق ساۋاتتىلىعىن ارتتىرۋعا باعىتتالعان «قارجىلىق ساۋاتتىلىقتى ارتتىرۋ» پارتيالىق جوباسى باستالدى.
«بۇل اۋىل تۇرعىندارىن الاياقتاردىڭ ىقپالىنان، قارجى پيراميدالارىنا الدانىپ قالۋدان جانە باسقا دا كۇماندى قارجىلىق وپەراتسيالاردان قورعاۋعا كومەكتەسەدى. مۇنداي جاعدايلارعا تاپ بولعان ادامدارعا كونسۋلتاتسيالىق كومەك كورسەتىلەدى. الداعى ۋاقىتتا 166 قارجى ساراپشىسى 250 مىڭ ادامدى قامتي وتىرىپ، ەلىمىزدىڭ شالعايىنداعى بارلىق ەلدى مەكەندى ارالاپ شىعادى. وقىتۋدىڭ ءبىر كۋرسى 5 كۇنگە سوزىلادى»، - دەدى پارتيا توراعاسى.
بارلىق كەزدەسۋدە ەرلان قوشانوۆ اۋىلدى دامىتۋ – مەملەكەت باسشىسى ساياساتىنىڭ باستى باسىمدىعى ەكەنىن اتاپ ءوتتى. بۇعان قوماقتى قارجى بولىنەدى. اۋىلداردىڭ ينفراقۇرىلىمىن – جولداردى، دەنساۋلىق ساقتاۋ، ءبىلىم بەرۋ جۇيەلەرىن جانە ت.ب. ايتارلىقتاي جاقسارتۋ جوسپارلانۋدا. جۇمىس ورىندارى اشىلۋدا. ال «AMANAT» پارتياسى پرەزيدەنت باعىتىنىڭ قوعامدىق تىرەگى رەتىندە وسى مىندەتتەرگە قولداۋ كورسەتۋ ءۇشىن ءوزىنىڭ بارلىق رەسۋرسىن جۇمىلدىرۋعا نيەتتى. پارتيا فيليالدارى وسى باعىتتا جۇمىس ىستەيدى.
