قۇربىسىن اياۋسىز سوققىعا جىققان تالدىقورعاندىق 3 ءجاسوسپىرىم قىز جازادان قۇتىلىپ كەتتى. ءبىرىسىنىڭ الەۋمەتتىك جەلىدە شەتەلدىك ازاماتپەن قوناق ۇيدە كەزدەسكەن سۋرەتى جانە ءبارىنىڭ ىشىمدىك ءىشىپ وتىرعان ۆيدەوسى تارادى. بۇرىمدىلاردىڭ بۇلاعاي قىلىعىنا قاتىستى قاتاڭ شارا قولداندار جوق، دەپ جازدى “ادىرنا” ۇلتتىق پورتالى جازدى.
الەۋمەتتىك جەلىدە 3 ءجاسوسپىرىم قىزدىڭ پاتەردە قۇربىسىن اياۋسىز سوققىعا جىققانىن بەينەلەيتىن ۆيدەو قوعامدى دۇرلىكتىرگەن ەدى. كەيىنگى دەرەكتەر دە كوڭىل كونشىتپەدى. 3 قىزدىڭ ءبىرى - مەيرامگۇلدىڭ شەتەل ازاماتىمەن كەزدەسكەن سۋرەتى شىقتى. قۇندىز اكەسىمەن بىرگە حالىقتان كەشىرىم سۇرادى. ايسۇلۋ جاپا شەككەن قۇربىسىن ءالى بوپسالاپ وتىر. بىراق ولاردىڭ ارەكەتىنە توقتاۋ سالعان ەشكىم جوق. بۇعان قاتىستى جۋرناليست سامال قابىشەۆا جازبا جاريالادى.
- ايسۇلۋعا ەشتەڭە دە بولمايتىن بولدى. ونىڭ ماسەلەسىن قاراعان "قاراتال اۋدانىنداعى كامەلەتكە تولماعان بالالاردىڭ كوميسسياسىنىڭ وكىلدەرى" وسىنداي شەشىم شىعارعان. ياعني، ايسۇلۋ ۇشتوبەگى باستوبە
تەحنيكالىق كوللەدجىندە وقۋىن جالعاستىرا بەرەدى. بۇزىقتارعا ارنالعان دەۆيانتتاردىڭ مەكتەبىندە اۋىستىرىلمايدى. ءبىز بەن ءسىزدىڭ ارامىزدا ەمىن-ەركىن جۇرە بەرەدى. كوميسسيا ءۇش اي وعان سىناق بەردى، ەگەر بۇزاقىلىق جاساسا وقۋدان قۋىلادى دەپ كوميسسيا وكىلدەرى قۋىپ وتىر. ونى بۇزىقتاردىڭ تىزىمىنە الدىق دەپ ءماز. ەەە، ءبىرىنشى بولىپ ۇرىپ باستاعان وسى ايسۇلۋ ەمەس پە ەدى. ۇرۋ تاكتيكاسىنىڭ ءوزى كاسىبي تۇردە. ىستەگەن ىستەرى اككى قىلمىسكەردەن ەش ايىرماشىلىق جوق. ولار مادينانى [جاپا شەككەن قىز] جىبەرمەي ۇستاپ وتىرعان. ۇرعان. مادينانى پوليتسيا بارىپ، الىپ شىققان. دەمەك، ادام ۇرلىعى بولىپ تۇر بۇل جەردە. نەگە سىزدەر قىلمىستىق ءىس قوزعامادىڭىزدار؟! ولاردىڭ قانداي قۇقى بار، ادامدى قيناپ ۇستاۋعا؟ الدە تالدىقورعاندا باسقا زاڭ با؟ ال قاراتال اۋدانىنىڭ كوميسسياسىنا 2 دەگەن باعا بەرەمىن. قوعامعا مۇلدەم جاناشىرلىقتارىڭ جوق ەكەن. قانشا كۇننەن بەرى بۇكىل قازاقستان شۋلاپ جاتىر وسى تالدىقورعانداعى قىزداردىڭ توبەلەسى بويىنشا. بەكەردەن بەكەر شۋلاپ جاتقان جوق. ولار ءوز بالالارى ءۇشىن الاڭدايدى، ەرتەڭگى كۇنىمىز ءۇشىن الاڭدايدى. كامەلەتكە تولماعانداردىڭ بەتىمەن كەتكەنىنە كۇيىنگەندىكتەن الاڭدايدى. نەگە كوميسسيا مۇشەلەرى وسى جاۋاپكەرشىلىكتى تۇسىنبەدىڭىزدەر. ايسۇلۋدىڭ دەۆيانتتارعا ارنالعان مەكتەپكە اۋىسىۋىن تالاپ ەتەمىن. ەگەر ەسكەرمەسەڭىزدەر، تالابىما قۇلاق اسپاساڭىزدار. ءبىز قوعام بولىپ نارازىلىققا شىعامىز. جەتەر بارىنە! تويدىق!بۇل قىزدار بۇل قىلمىسقا سانالى تۇردە، الدىن-الا ءسوز بايلاسۋ ارقىلى بارعان. ياعني، پاتەردى جالداعان. مادينانى الىپ كەلگەن. ۇرعان. جىبەرمەي وتىرعان. مادينانى پوليتسيا بارىپ، الىپ شىققان. ول ازداي ەسىكتى بىردەن اشپاعان. بۇل قىلمىس! - دەپ جازدى سامال قابىشەۆا.
باسىنا زاقىم كەلگەن مادينا قازىر اۋرۋحانادا ەم قابىلداپ جاتىر. بىراق ماديناعا بۇزاقى ءجاسوسپىرىم قىزدار قوقان-لوقى كورسەتۋىن قويار ەمەس. بۇعان قاتىستى جۋرناليست:
- جۇمىس جۇرگىزگەندەرىڭىز وسى ما؟ ەرتەڭ ادام ولەدى، سونى كۇتىپ وتىرسىزدار ما؟ تالدىقورعاندا ءۇش قىزدان وڭباي تاياق جەگەن مادينانىڭ ومىرىنە قاۋىپ ءتونىپ تۇر. مىنا بەتىمەن كەتكەندەر توقتار ەمەس، جان-جاقتان وسىلاي قورقىتىپ، ۇركىتىپ جاتىر - دەپ دابىل قاعىپ وتىر.
“ادىرنا” ۇلتتىق پورتالى
