كورەياعا جۇمىس ىستەۋگە كەتكەن وتانداسىمىز ءبىر جارىم جىلدان بەرى تابىلماي جاتىر، دەپ حابارلايدى «ادىرنا» ءتىلشىسى «استانا» تەلەارناسىنا سىلتەمە جاساپ.
شىعىس قازاقستان وبلىسىنىڭ تۋماسى العاشقى كەزدە اناسىمەن تۇراقتى حابارلاسىپ تۇرعان. تاپقان تابىسىن جىبەرىپ وتىرعان. ەندى اتا-انا قىزىنان حابار الا الماي جۇرگەنىن ايتادى.
البينا كابدۋلدينا ەسەپشى ماماندىعىن مەڭگەرىپ، ساۋدا ۇيىندە ساتۋشى بولىپ جۇمىس ىستەدى. جولداسى قايتىس بولىپ، 13 جاستاعى جالعىز قىزىمەن قالادى. اناسىنا باسپانا الىپ بەرمەك نيەتپەن تابىسى كوپ جۇمىس ىزدەيدى. وسى ماقساتتا 2019 جىلى كورەياعا كەتەدى.
«ۇنەمى بايلانىستا بولدى. ءبىر ەمەس، ەكى رەت شىعاتىن. جۇمىس ورنىن كورسەتەتىن. قايدا ىستەپ جاتقانىن، زاۋىتتارىن كورسەتەتىن. پاندەميا ۋاقىتىندا ۆيزاسىمەن پروبلەما بولدى. سول كەزدە شىعا الماي قالدىم دەدى. بىراق باستىقتارى كەرەك زاتتى اكەپ بەرەتىنىن ايتقان. پۋسان، سەۋل دەگەن قالالاردى جۇمىس تابۋ ءۇشىن اۋىستىرىپ وتىردى. ۇيگە قايت دەگەنىمدە: «مام، ۇيگە بارعاندا نە ىستەيمىن، تابىس جوق»،—دەپ جاۋاپ بەرەتىن. ايتەۋىر كەلگەننەن كەيىن بىردەڭەسىن جيناپ، تەرىپ، بىردەڭە الامىز دەپ سونداي نيەتپەن كەتتى عوي»،—دەيدى ارۋدىڭ اناسى.
35 جاستاعى البينامەن بايلانىس 2021 جىلدىڭ 13 ماۋسىمىندا ءۇزىلدى. ءوزىن قويارعا جەر تاپپاعان انا قىزىن تاۋىپ بەرەمىن دەگەن ايلاكەرلەرگە تاپ بولىپ، 10 ملنعا جۋىق اقشا بەرگەن.
«مىنە، 1 جارىم جىل بولدى. قايدا ەكەنىن بىلمەيمىن. بارلىق مۇمكىندىكتى جاسادىق. دۇنيەنىڭ اقشاسىن جىبەردىك. ءبىر ايەل بولىسامىن دەپ ۇلكەن اقشاعا الداپ كەتتى. ەندى كىمگە سەنۋگە، نە ىستەۋگە بولاتىنىن بلمەيمىن»، – دەپ مۇڭىمەن ءبولىستى ايگۇل بولساەۆا.
اناسىنىڭ باسپاعان تابالدىرىعى، اشپاعان ەسىگى قالمادى. زاڭسىز ميگرانتتاردىڭ قۇقىعىن قورعايتىن «كورەيا كومەك» قايىرىمدىلىق قورىنىڭ مۇشەسى سامات احمەتوۆ تە وتانداسىمىزدى ىزدەۋگە اتسالىسىپ كەلەدى.
«البينا دەگەن قارىنداسىمىزدى دا قر وڭتۇستىك كورەياداعى ەلشىلىگى وتە جاقسى كومەكتەسىپ، بارلىق جەرگە اقپاراتتاردى تاراتىپ، تەرگەۋ جانە قۇقىق قورعاۋ ورگاندارىمەن 3-4 رەت كەزدەسۋ وتكىزدى. ءبىزدىڭ ءوزىمىز «كورەيا كومەك» قورى البينانىڭ ماماسىمەن تىكەلەي بايلانىس ورناتىپ، كورەيانىڭ 72 ءمايىتحاناسىنا بارىپ، ولگەندەردىڭ اراسىندا بالكىم بار شىعار دەپ ىزدەدىك، الايدا ولگەندەردىڭ قاتارىندا دا، ميگراتسيالىق بولىمگە، تۇرمەگە تۇسكەندەردىڭ قاتارىندا دا قارىنداسىمىزدىڭ جوق بولىپ شىقتى»، – دەيدى ول.
قازىر وڭتۇستىك كورەيادا 37 مىڭنان استام قازاقستاندىق بار. ولاردىڭ 11 مىڭى زاڭسىز ميگرانت. جىلىنا سول ەلدە ءىز-ءتۇزسىز جوعالاتىن جەرگىلىكتى جانە شەتەل ازاماتتاردىڭ سانى 11 مىڭنان اسادى.
