20 قازان كۇنى باتىس قازاقستان وبلىسىنا وڭتۇستىك كورەيانىڭ كۆاندونگ ۋنيۆەرسيتەتى جانىنداعى حالىقارالىق "Saint Mary" كلينيكاسىنىڭ دەلەگاتسياسى رەسمي ساپارمەن كەلدى.
دەلەگاتسيانى كلينيكانىڭ پرەزيدەنتى جانە باس اتقارۋشى ديرەكتورى كو دون حيون مىرزا باستاپ كەلدى.ساپار بارىسىندا تاراپتار دەنساۋلىق ساقتاۋ سالاسىندا ىنتىماقتاستىق ورناتىپ، ءوزارا تۇسىنىستىك تۋرالى مەموراندۋمعا قول قويدى.
مەموراندۋم اياسىندا مەديتسينا سالاسىندا تاجىريبە الماسۋ، حالىقارالىق مەديتسينالىق جوبالاردى بىرلەسىپ جۇزەگە اسىرۋ، زاماناۋي تەحنولوگيالار مەن تاجىريبەلەرمەن الماسۋ، قازاقستاندىق مامانداردى كورەيادا وقىتۋ جانە تاعىلىمدامادان وتكىزۋ ماسەلەلەرى تالقىلاندى.
باتىس قازاقستان وبلىسىنىڭ اكىمى ناريمان تورەعاليەۆتىڭ ايتۋىنشا، بۇل كەلىسىم – ءوڭىر مەديتسيناسىنىڭ ساپاسىن ارتتىرۋعا جانە حالىقارالىق ستاندارتتارعا ساي تاجىريبەنى ەنگىزۋگە ۇلكەن مۇمكىندىك.
"بۇل قۇجاتتىڭ ماڭىزى زور. كورەيالىق تاراپ دارىگەرلەرىمىزدى تاعىلىمدامادان وتكىزۋگە، شەبەرلىك ساباقتارى مەن سەمينارلار ۇيىمداستىرۋعا دايىن ەكەنىن ءبىلدىردى. سونىمەن قاتار ولاردىڭ جەتەكشى ماماندارى وڭىرىمىزگە كەلىپ، بىرلەسىپ جۇمىس ىستەۋگە نيەتتى. ءبىز بۇل كەزدەسۋدى تەك رەسمي ءراسىم رەتىندە ەمەس، ناقتى ناتيجەگە باعىتتالعان ىنتىماقتاستىقتىڭ باستاۋى دەپ ەسەپتەيمىز", – دەدى وبلىس اكىمى ناريمان تورەعاليەۆ.
«Saint Mary» كلينيكاسىنىڭ پرەزيدەنتى جانە باس اتقارۋشى ديرەكتورى كو دون حيون مىرزا ءوز سوزىندە كلينيكانىڭ ميسسياسى تەك پايدا تابۋ ەمەس، مەديتسينالىق ءبىلىمدى ءبولىسۋ ارقىلى باسقا ەلدەردىڭ دەنساۋلىق ساقتاۋ جۇيەسىن دامىتۋ ەكەنىن اتاپ ءوتتى.
«قازىر ءبىز شەتەلدىك مامانداردى قابىلداپ، ولاردى تاجىريبەدەن وتكىزۋ باعدارلامالارىن ىسكە اسىرىپ جاتىرمىز. اسىرەسە جۇرەك-قان تامىرلارى، مي قان تامىرلارى مەن ونكولوگيالىق اۋرۋلار بويىنشا جوعارى بىلىكتى ماماندارىمىز بار. باتىس قازاقستان وبلىسىمەن دە ناقتى ناتيجەلەرگە جەتۋدى كوزدەيمىز»، – دەدى ول.
بۇل ىنتىماقتاستىق – ءوڭىر مەديتسيناسىن جاڭا دەڭگەيگە كوتەرۋگە باعىتتالعان ناقتى قادام. تاراپتار مەموراندۋم قاعاز جۇزىندە قالىپ قويماي، جۇزەگە اساتىن جوبالارمەن تولىقتىرۋعا ۋاعدالاستى.
