Koreıaǵa jumys isteýge ketken otandasymyz bir jarym jyldan beri tabylmaı jatyr, dep habarlaıdy «Adyrna» tilshisi «Astana» telearnasyna silteme jasap.
Shyǵys Qazaqstan oblysynyń týmasy alǵashqy kezde anasymen turaqty habarlasyp turǵan. Tapqan tabysyn jiberip otyrǵan. Endi ata-ana qyzynan habar ala almaı júrgenin aıtady.
Albına Kabdýldına esepshi mamandyǵyn meńgerip, saýda úıinde satýshy bolyp jumys istedi. Joldasy qaıtys bolyp, 13 jastaǵy jalǵyz qyzymen qalady. Anasyna baspana alyp bermek nıetpen tabysy kóp jumys izdeıdi. Osy maqsatta 2019 jyly Koreıaǵa ketedi.
«Únemi baılanysta boldy. Bir emes, eki ret shyǵatyn. Jumys ornyn kórsetetin. Qaıda istep jatqanyn, zaýyttaryn kórsetetin. Pandemııa ýaqytynda vızasymen problema boldy. Sol kezde shyǵa almaı qaldym dedi. Biraq bastyqtary kerek zatty ákep beretinin aıtqan. Pýsan, Seýl degen qalalardy jumys tabý úshin aýystyryp otyrdy. Úıge qaıt degenimde: «Mam, úıge barǵanda ne isteımin, tabys joq»,—dep jaýap beretin. Áıteýir kelgennen keıin birdeńesin jınap, terip, birdeńe alamyz dep sondaı nıetpen ketti ǵoı»,—deıdi arýdyń anasy.
35 jastaǵy Albınamen baılanys 2021 jyldyń 13 maýsymynda úzildi. Ózin qoıarǵa jer tappaǵan ana qyzyn taýyp beremin degen aılakerlerge tap bolyp, 10 mlnǵa jýyq aqsha bergen.
«Mine, 1 jarym jyl boldy. Qaıda ekenin bilmeımin. Barlyq múmkindikti jasadyq. Dúnıeniń aqshasyn jiberdik. Bir áıel bolysamyn dep úlken aqshaǵa aldap ketti. Endi kimge senýge, ne isteýge bolatynyn blmeımin», – dep muńymen bólisti Aıgúl Bolsaeva.
Anasynyń baspaǵan tabaldyryǵy, ashpaǵan esigi qalmady. Zańsyz mıgranttardyń quqyǵyn qorǵaıtyn «Koreıa kómek» qaıyrymdylyq qorynyń múshesi Samat Ahmetov te otandasymyzdy izdeýge atsalysyp keledi.
«Albına degen qaryndasymyzdy da QR Ońtústik Koreıadaǵy elshiligi óte jaqsy kómektesip, barlyq jerge aqparattardy taratyp, tergeý jáne quqyq qorǵaý organdarymen 3-4 ret kezdesý ótkizdi. Bizdiń ózimiz «Koreıa kómek» qory Albınanyń mamasymen tikeleı baılanys ornatyp, Koreıanyń 72 máıithanasyna baryp, ólgenderdiń arasynda bálkim bar shyǵar dep izdedik, alaıda ólgenderdiń qatarynda da, mıgraııalyq bólimge, túrmege túskenderdiń qatarynda da qaryndasymyzdyń joq bolyp shyqty», – deıdi ol.
Qazir Ońtústik Koreıada 37 myńnan astam qazaqstandyq bar. Olardyń 11 myńy zańsyz mıgrant. Jylyna sol elde iz-túzsiz joǵalatyn jergilikti jáne shetel azamattardyń sany 11 myńnan asady.
