ايتىسكەر اقىن سەرىكزات دۇيسەنعازى قاپيادا كوز جۇمعان 16 جاستاعى ۇلىنىڭ رۋحىنا جىر ارنادى. ولەڭىن اقىن ولەڭىن الەۋمەتتىك جەلىدەگى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
ەي، جۇرەگىم، سابىر، سابىر، سابىر دە،
جاسامايىن كۇپىرشىلىك تاڭىرگە.
قۇلىنىمدى قيىپ بەردىم، قايتەيىن،
قابىرعاسى قارا سۋىق قابىرگە.
تۋرا كەلگەن نە ىستەي الام اجالعا؟
ءسوز تابا الماي قور بولدىم-اۋ، جازارعا.
قالامىمنان قارا سيا توگىلدى،
اق پاراقتىڭ بەتىندەگى عازالعا.
قاپەلىمدە وي دا كەلمەي ورامدى،
توقتاتا الماي كوزدەن اققان سورامدى.
قاڭتار تۋا قاڭتارىلدىم باسا الماي،
ىشىمدەگى الاي-تۇلەي بوراندى.
جىلايمىن عوي، قايتەم ەندى جىلاماي،
تاعدىر مەنى جىبەرمەدى سىناماي.
كۇڭىرەنگەن شىعار بالكىم وسىلاي،
ابىشىنەن ايرىلعاندا ۇلى اباي.
زور قايعىدان كوتەرە الماي ەڭسەمدى،
كوز الدىمدا اسپان مەن جەر تەڭسەلدى.
ون التى-اق جىل ويناقتاعان، قارعام-اي،
سەنەن دە اتتەڭ، ءوتتى-اۋ جالعان ولشەۋلى.
عالىم بولار، اقىن بولار دەپ ەدىم،
كوز ءتيدى مە، دارا تۋعان بوبەگىم؟
ءوڭ مەن ءتۇستىڭ اراسىندا وتىرمىن،
ءتۇسىم قاشىپ تۇسىنە الماي سەبەبىن.
دۇنيەنىڭ ولشەي بىلگەن پارىعىن،
ادالدىقتى جۇرەگىڭنەن تانىدىم.
زاۋ بيىكتە اپپاق قاردىڭ ۇستىندە،
زاۋلاپ كەلىپ جانى ۇزىلگەن جارىعىم.
اۋلەتىمنىڭ ماڭدايداعى باعى ەدىڭ،
اكەسىنەن اسسام دەيتىن بالا ەدىڭ.
ارمانىڭا جەتپەي كەتكەن جانىڭدى،
تىنىشتىقتا الديلەسىن اق ءولىم.
اۋىرلىعى قارا جەردەي سىناقتىڭ،
قاسىرەتىنە قارسى تۇرىپ شىداپپىن.
قۇلىنشاعىم شاپاعاتشى بولار دەپ،
باقشاسىندا سەگىز ءتۇرلى جۇماقتىڭ
