بىرنەشە ءوڭىردى سۋ الىپ، ەل باسىنا كۇن تۋعاندا اقىندار ءۇنسىز قالمادى. ولار ىشتەگى مۇڭ مەن حالىقتىڭ قازىرگى كۇيىن ولەڭ ارقىلى جەتكىزۋدە.
اقىن قايىربەك شاعىر Facebook پاراقشاسىنا نە ءۇشىن كۇن وقيعاسىن ولەڭگە تۇسىرگەنىن بىلاي ءتۇسىندىرىپتى.
"ليريكاعا ساياساتتى ارالاستىرمايىن دەيسىڭ، بىراق اينالادا بولىپ جاتقان وقيعالار كوڭىلىڭدى الاڭداتقان سوڭ، ولەڭگە تۇسىرمەسكە لاج جوق", - دەپ ولەڭ ارنادى.
قالعاندا سۋ استىندا مومىن جاندار،
اقشانىڭ تاسقىنىنا شومىلعاندار،
ەل باسىنا كۇن تۋعان مىنا كۇندە،
ەتىكپەن سۋ كەشۋگە قورىنباڭدار.
ۋايىمداپ كەدەي ءجۇر عوي كرەديتىن،
وسىمقور ميىعىنان كۇلەدى ءيتىڭ.
حالىقتى كۇنكورىسكە بايلاپ قويسا،
قۇل قىلۋ وڭايلىعىن بىلەدى ءيتىڭ.
اقىن ەرشات قايبولدين دە سۋ باسقان اۋىلداردىڭ ءجاي-كۇيىن جىرلاعان:
كوكتەم سايىن اۋىلدى سۋ باسادى،
كوكتەم سايىن اعايىن شۋلاسادى.
سۋدان قۇرعاق شىعاتىن سۋايت كوكەم
سالى سۋعا كەتكەندەي ءتۇر جاسادى.
“بەلگىلى عوي تاسقىننىڭ جۇرەتىنى،
سابىر، سابىر” كوكەمنىڭ بىلەتىنى.
بالشىق باسىپ كورمەگەن سۋداي جاڭا،
شىركىن، قانداي ادەمى سۋ ەتىگى؟!
حالىقتىڭ كوكتەمگى كوڭىل-كۇيىن سەل بۇزعان.
ءساتجان كارىپباەۆ بيلىك وكىلدەرىنىڭ راپورتىنا مەڭزەپ "تۇراقتالدى" دەپ جىرلاتىپ، باسپاناسىز قالعانداردىڭ جايىن ايتتى.
قازاق سان وتكەرسە دە سىناقتاردى،
بۇل قوعام...
قاشان دا ءبىر-اق قالپى...
توپان سۋ جايلاپ جاتقان جەردى كورسەم...
كوكەيىمدە ونسىز دا سان سۇراق قالدى.
باس قايعى باسپاناسى... بالا جىلاپ،
زار يلەپ،ەل بيلىككە سىر اقتاردى.
سىر اقتاردى...
بيلىكتەن ءبىر-اق جاۋاپ...
"ول اۋداندا جاعداي سول تۇراقتالدى".
اقىن داۋرەن بەرىكقاجىۇلى Facebook جەلىسىندەگى پاراقشاسىندا:
ءوز-وزىنەن شەشىلەتىن سياقتى
بۇل قازاقتىڭ تاعدىرى -
تىم الاڭسىز قار جاۋادى ۇياتتى،
تىم مەزگىلسىز سىركىرەيدى جاڭبىرى.
باعىم ۇشىپ باراتقانداي باستاعى
تەرلەپ شىقسام ءوز-ءوزىمدى سۇراققا اپ.
تىم كوڭىلدى كورىنەدى اسپانى،
اقپانى دا تىم بەيكۇنا، تىم اپپاق.
كۇننەن-كۇنگە تۇسىنۋدەن قالدىم مەن
بۇل ۇلىستى، راسىندا.
شىعار دەپ ەم اقىل-ەسىم ءسال كىرگەن
ءدال وسىناۋ جاسىمدا.
قازاق دەسە جانىن سىعىپ بەرەتىن
تىم سۇيكىمدى مازدايدى وت وشاقتا.
سوندا مەنىڭ الدەقانداي كورەتىن
مەملەكەتىم وسى-اق پا؟ - دەپ ولەڭدەتتى.
تاسقىن ماسەلەسىنە بەي-جاي قاراي الماعان اقىننىڭ ءبىرى - ارمان جۋسانباەۆ. ول سەل باسىپ، بوگەتتەر بۇزىلىپ جاتقانداعى بيلىكتىڭ بۇگىنگى ارەكەتىن سىنعا الدى.
كوزىن جاسىن سورلى ەلىم كول ەتكەندە،
سەل باستى دا بۇزىلدى بوگەت دەمدە...
جەمقورلىقپەن بەتپە-بەت كەلىپ تۇرسىڭ،
قيامەت كۇن قىينالىپ سول وتكەلدە!.
تويمادىڭ با سۋدىر ءسوز ۋادەگە،
قۇرعاق قيال –جەل قايىق قۋا بەرمە!.
جۇماق جاساۋ ءوزىڭنىڭ قولىڭدا تۇر،
توزاق جاساۋ ءتىپتى وڭاي مىنا جەردە!
جاعىمپازدار جالباقاي قىرتقا اينالار،
قايدا قامسىز الاڭسىز جۇرتقا ءجاي بار؟
سالىڭ سۋعا كەتكەندە توپالاڭمەن،
قۇتقارمايدى سەنى كەپ نۇق پايعامبار!
اقىن سانجار كەلەكەەۆ تە ء"اي، ۇكىمەت!" دەپ سىندارلى شاقتاعى بيلىكتىڭ ارەكەتىن سىنعا الدى.
جازامىن جابىعىپ جىر، تورىعىپ ءان،
كىم بار ەي... كىم بار دەيسىڭ سونى ۇعىنعان؟
باس-باسىنا بي بولعان كوكەلەردىڭ،
كەلمەيدى ەكەن توپان سۋ توبىعىنان.
قاردىڭ سۋى.
قارعىن سۋ دالانى الىپ،
پانالاعان بايعۇس جۇرت جاعا بارىپ.
ماڭدايىنان بەس ەلى سور كەتپەگەن،
سول باياعى، باياعى قارا حالىق.
ءىسى باسقا..
سوزدەرى كىل جاساندى،
قۋ بيلىككە قارايدى كۇن قاشانعى؟
ۋادەسىنىڭ تۇككە دە تامتىعى جوق،
قۇر مىنبەدە وتىرىپ شۋلاسادى.
بوگەتى جوق..
قاتىرعان بوگەنى جوق،
كوكتەم كەلسە جەرىمدى سۋ باسادى.
تۇككە تۇرماس ءسوز قىلىپ ناسىبايدى،
تۇكىرىگى اۋىزىنان شاشىرايدى.
كوتەندەرىن ماي باسقان كوكەلەرىم،
كرەسلوعا قۇل بولعان باسىبايلى.
ءوز جىرتىعىن جاماعان ءوز ەلىنە،
ەشبىرىنىڭ جاندارى اشىمايدى.
سەنى قايدام بيلىگىم...
مەن قايعىردىم.
تۋماستاي بوپ كوگىمنەن ەندى اي، كۇنىم.
وت الادى قيساپسىز جەر بايلىعىن،
جات الادى ەسەپسىز ەل بايلىعىن.
ءسوز تۇسىنسە باس يزەر قۇپتاعانى،
قانشا ايتساڭ دا ۇقپايدى ، ۇقپاعانى.
ءاي، ۇكىمەت قاشانعى جۇت بولادى،
قاشان ءبىزدىڭ قازاققا قۇت قونادى ؟
جاۋاپ بەر؟!
الەۋمەتتىك جەلىدە وقيعاعا ءۇن قوسقان اقىندار ءبىر بۇل ەمەس. دەگەنمەن العاشقى لەكپەن 12 وبلىستا بولعان اپاتتى جاعدايعا بەي-جاي قاراماي، جانىمەن بولسا دا ەلىمەن بىرگە ەكەنىن تانىتقان اقىندار توبى وسىنداي بولدى.
سىمبات ناۋحان
"ادىرنا" ۇلتتىق پورتالى
