بۇگىن ءماجىلىستىڭ جالپى وتىرىسىندا باس پروكۋرور قاندى قاڭتاردا شابۋىلداۋشىلارعا وق اتۋ پرەزيدەنت بۇيرىعىنان بۇرىن باستالعانىن ءمالىم ەتتى، دەپ جازادى "ادىرنا" ۇلتتىق پورتالى.
«قۇرمەتتى دەپۋتاتتار! كۇشتىك قۇرىلىم قىزمەتكەرلەرى اتىس قارۋىن ءبىرىنشى رەت الماتىداعى پرەزيدەنت رەزيدەنتسياسىن قورعاۋ كەزىندە – 5 قاڭتار كۇنى ساعات 16:00 شاماسىندا قولدانعانىنا ەرەكشە نازار اۋدارعىم كەلەدى. ودان كەيىن پوليتسيا مەن اكىمدىكتەر عيماراتتارىنا جانە باسقا دا وبەكتىلەرگە شابۋىل جاسالعاندا، ياعني تارتىپسىزدىكتەر كۇش كورسەتۋ ساتىسىنا وتكەن كەزدە قۇقىق قورعاۋ ورگاندارىنىڭ قىزمەتكەرلەرى قارۋ قولدانعان. دەمەك، شابۋىلداۋشىلارعا قارسى وق اتۋ پرەزيدەنتتىڭ بەلگىلى مالىمدەمەسىنەن ەداۋىر بۇرىن بولعان. بۇل جاعداي تۋرالى بارلىق ديسكۋسسيا قوعامدىق پىكىردى ادەيى باسقا باعىتقا بۇرۋدا. ءىس جۇزىندە، قىلمىسكەرلەرگە وق اتۋ ءۇشىن كۇشتىك قۇرىلىمدارعا ارنايى بۇيرىق قاجەت ەمەس. بۇل تۋرالى: قۇقىق قورعاۋ قىزمەتى تۋرالى; ۇلتتىق گۆارديا تۋرالى; تەرروريزمگە قارسى ءىس-قيمىل تۋرالى زاڭداردا تىكەلەي نورمالار بار. ولار ادامداردىڭ ءومىرى مەن دەنساۋلىعىنا قاتەر تونگەن جاعدايدا شابۋىلدى تويتارۋ ءۇشىن اتىس قارۋىن قولدانۋعا مۇمكىندىك بەرەدى»، - دەدى باس پروكۋرور.
"ادىرنا" ۇلتتىق پورتالى
